‘Tumunikei bwa Bimuni’
1 Mu ino fukutu ya ku mushipiditu ne ya mu mwikadilo idi’mo ino ngikadilo ya bintu, batōtyi ba Yehova, Leza wabine, kintu kya midiyo isamba, ‘bamunikanga bwa bimuni’ mu matanda 234 kujokoloka ntanda yonso. (Fid. 2:15) Kino kyo kituyukanya ku bantu bonso. Ino tumwekejanga namani mwinya wa bubinebine utamba kudi Yehova?—2 Kod. 3:18.
2 Na Bilongwa Byetu: Bantu kebejangapo kujingulula mwikadilo wetu. (1 Pet. 2:12) Lolo umo wanene amba mwingidi nandi Kamoni wadi biyampe, ukwashañana, kadi kadipo unena binenwa bya mutonko nansha kusepa shi bantu bazaula mizaulo mikobakane. Padi patompa bantu bamo kukolomona uno Kamoni na kunena binenwa bya bulembakane padi, aye wadi uba’tu nyā, kasha usumininwa kulonga byoloke. Lelo kino kyatengele yewa lolo namani? Uvuluka’mba: “Mwikadilo wandi wauntengele mpata ku mutyima nafula ku kwipangula bipangujo bitala Bible. Nashilula kwifunda Kinenwa kya Leza ne mwenda mafuku nabatyijibwa.” Ubweja’ko amba: “Mwikadilo wandi o waunekenye naikala na mutyima wa kusaka kubandaula nkulupilo ya Batumoni ba Yehova.”
3 Mwikadilo wetu ku meso a ba lupusa, mumweno otumona milongelo ya ino ntanda, muneneno wetu wampikwa kakoba o wituyukanya batwe Batumoni ba Yehova bu bantu badi na būmi bukwatañene na misoñanya ya peulu ya mu Bible. Mingilo milumbuluke ya uno muswelo ipejanga Yehova ntumbo ne kukokela bakwabo ku mutōtelo wandi.
4 Na Binenwa Byetu: Na bubine, boba bamona mwikadilo wetu muyampe kebakokejapo padi kuyuka kine kyotwikadile beshile na bakwabo, poso’nka tubebasapwila nkulupilo yetu. Lelo bengidi nobe nansha bakwenu ba ku masomo bayukile amba wi Kamoni wa Yehova? Lelo ukimbanga mikenga ya kwalamuna mīsambo isambwa bitupu ke busapudi? Lelo usumininwe ‘kusokola bumwinya bobe ku bantu’ ponso pomona mukenga mufwaninwe?—Mat. 5:14-16.
5 Kuvuija mwingilo otupelwe wa bu basedi ba mwinya kulomba mushipiditu wa kwipāna. Kwikala na mutyima wa kwingila na muya onso kuketutonona twijibe kulonga bintu bya mvubu mityetye mwa kulongela bintu bivule mpata mu mwingilo upandija būmi bwa bantu, mwingilo wa kusapula ne kulonga bana ba bwanga.—2 Kod. 12:15.
6 Shi ke pano, twendelelei na kumunika bwa bimuni mu bilongwa ne mu binenwa byetu bine. Namino, bakwabo kebakabulwepo kwikala na mutyima wa kwilunga kotudi mwanda wa kutumbija Yehova ntumbo.