Mwingilo Wa Bupania—Lelo Wiubwanya Ne Abe?
1 “Ami nkimwenepo ne kyonkambakena kine na kwela milafwe ku kintu kikwabo kya kulonga, shi kika, shi kika. Mwanda monamwena, i kutupu kintu kikwabo kibwanya kuleta nsangaji idingakene na ino.” I ani wanene namino? I umo wa mu Batumoni ba Yehova tutwa na tutwa bengila na mutyima umo mwingilo wa kitatyi kyonso. Lelo kodi kala mwiipangule mu milombelo shi mwingilo wa bupania wiubwanya ne abe? Byotwipēne lonso kudi Yehova, tufwaninwe bine kulanguluka mwa kuyukila shi tubwanya kupityija kitatyi kivule mu kusambakanya myanda miyampe ya Bulopwe. Pa kino, tubandaulei bipangujo bimobimo biipangulanga bavule pangala pa mwingilo wa bupania.
KIPANGUJO 1: “Twivwananga bantu banena’mba ke bonsopo bakokeja kwikala bapania. Lelo nkayuka namani amba uno mwingilo neubwanya ne ami?”
2 Kilondololwa kilondanga mungya ngikadilo yotudi’mo ne biselwa byetu bitupelwe mu Bible. Bukomo bwa ngitu nansha ngikadilo idi’mo bantu bavule kebibapangapo mukenga wa kupityija nsaa 90 pa kweji mu busapudi. Kifwa, bakaka bavule bakikōkeji i bakaji basongwe, bainabana bene Kidishitu. Batambilanga mu busapudi kitatyi ne kitatyi ponso pobamona kyaba mwendele ngikadilo yobadi’mo. Shi mukenga ubamweka, bengilanga bu bapania bakwashi mu bula bwa kweji umo nansha myeji mivule ku mwaka ne mwaka, uno o muswelo obangulanga nsangaji mikatampe ilupuka ku kuputumina kobaputuminanga mu mwingilo. (Ngat. 6:9) Nansha byobakikomenwe kwikala bapania ba kitatyi kyonso panopano, abo’ko badi na mushipiditu wa bupania, bine bano basapudi bapyasakane ba myanda miyampe i tutyi twelwa ku lūbako mu byabo bipwilo.
3 Kadi batutu ne bakaka bavule badi na biselwa bityetye belongololanga, batūla bintu bidi na mvubu mikatampe kumeso, mwa kwikadila’bo bapania. Le abe nobe? Lelo wi nsongwanzele mwine Kidishitu mupwije masomo? Le wi mukaji udi na mulume uyukile kusasaketa kisaka? Lelo udi na mwine pobe ino kemudipo na bana ba kulela? Le kodi mutambule pasho? Kwikala nansha kuleka kwikala pania i butyibi bufwaninwe kwityibila muntu ne muntu kasuku kandi. Ino kipangujo i kino: Lelo ukokeja kwilongolola mu bobe būmi nobe wikale pania?
4 Satana wingidijanga ngikadilo yandi ya bintu ituvudijija bintu bisaka meso bileta kilabi mu būmi bwetu, ukimba kwitulobeja ne na mushipiditu wa kwisakila. Ino shi tusumininwe kuleka kwikala ba ntanda, Yehova uketukwasha twendelele na kutūla tumweno twa Bulopwe pa kifuko kibajinji ne kukwata makasa abidi madyese onso a mu mwingilo wa Kiteokratike etupebwa. Shi tubwanya kwilongolola mwa kwikadila bapania, tubulwe’po kwikilonga?
KIPANGUJO 2: “Lelo nsa kuyuka namani shi mbwanya kwisasaketa aku ñingila mwingilo wa kitatyi kyonso?”
5 Yuka’mba, mu matanda mavule, kibalwa kya nsaa kipityijibwanga mu kaji ku yenga ne yenga mwa kusokwela kadyeya kyendanga kivudila’ko mwenda myaka. Ino banabetu bavule i bapania tamba makumi a myaka, ne Yehova wendelelanga na kwibakwatakanya. Pa kubwanya mwingilo wa bupania, kilomba kwikala na lwitabijo ne mushipiditu wa kwipāna. (Mat. 17:20) Mitōto 34:10 witukulupija’mba “boba bakukimba Yehova kebakabulwepo nansha kilumbuluke, mhm.” Yewa ushilula mwingilo wa bupania ufwaninwe kwiushilula koku ukulupile’mba Yehova ukamukwasha mu bisakibwa byandi. Mwanda Aye ukwatakanyanga bapania bakikōkeji bengila kujokoloka ntanda yonso! (Mit. 37:25) Kukwatañana na misoñanya idi mu 2 Tesalonika 3:8, 10 ne mu 1 Temote 5:8, bapania kebafwaninwepo kutengela’mba bakwabo bebakwatakanye na lupeto.
6 Muntu usa kwingila mwingilo wa bupania ufwaninwe kulonda ano madingi a Yesu: ‘Kushikata bidi mwa kupikwila mulupu.’ (Luka 14:28) Kulonga uno muswelo, kulombola tunangu tufwaninwe. Wisambe na bapania babwino bengilanga tamba myaka mivule. Wibepangule bakulombole mwibakwatakenyanga Yehova. Mutadi wenu wa kipindi nandi i pania wabwino, ukasangela kukupa madingi a mwa kubwaninya mwingilo wa kitatyi kyonso.
7 Bine, shi muntu ketūdilepo mu makasa a Yehova, kakapotololapo bubinebine bwa mulao ulaile Yesu mu Mateo 6:33. Kaka umo pania wakikōkeji wanene’mba: “Ami ne kaka pania mukwabo potwatuminwe mu mwaba mupya, twadi’nka na mani matyetye’tu, kakopo kamo ka manteka, pambulwa lupeto nansha. Ku kyolwa, byonso byapwa, ketunena’mba, ‘Ketukidipo na bya kudya kensha.’ Kumeso kwa kulāla, twaabija Leza pa uno mwanda. Bukya’tu lubanga na bwē, kaka umo mwine Kidishitu ushikatanga pabwipi na petu waiya kanena’mba: ‘Nadi nombela Yehova etutumine bapania. Nsa kwimutwala mu busapudi dyuba dyonso dituntulu, ino kwami byokudi kulampe’ko, nsaka tudīle pamo nenu pa midi. Nadi nselele byakudya bya batwe bonso busatu.’ Waletele mwita wa ntanda muvule ne mani.” Ke kyakutulumukapo, Yesu wētupele kala kikulupiji amba, ‘kemukizumbijazumbijai mityima pangala pa myuya yenu’! Kupwa wābweja’ko amba: “Lelo kudi umo po mudi’po ukokeja kulepeja’ko bidi mafuku a bumi bwandi na kwikambakanya mutyima wandi?”—Mat. 6:25, 27, MB.
8 Ntanda itujokolokele i mīpāne bininge mu kukimba byabupeta. Twi batyinibwe na lupusa lwitutonwena ku kulonga mulongela bonso. Ino shi twikale na mutyima wa kwityepeja, wa kukwata mwingilo wa kitatyi kyonso na mutyika, nankyo ketukakambakenapo bininge bintu bya kungitu. (1 Tem. 6:8) Bapania bekele na būmi bupēla, bulongololwe senene, badi na kitatyi kivule kya kuputumina mu mwingilo, bekalanga na nsangaji mikatampe, bakomo kumushipiditu mwanda bafundijanga bakwabo bubinebine. Abo ke bantupo ba bisela bya kujilajila, mumweno wabo mujalale obadi nao mu myanda itala lupeto o wibalupwilanga ku bya byabuyabuya bidi mu mwingilo wa bupania.
9 Shi tuyukile biyampe’mba tudi mu mafuku a ku mfulo ne amba kitatyi kyashadila’ko ino ntanda imbi ke kityetye, nankyo mutyima uketukunka kumushipiditu twipāne byabinebine mu kusapula myanda miyampe ponso potumona mikenga. Shi tutūkije mutyima pa ngikadilo yetu ya lupeto mokifwaninwe ne kutūla bintu byonso mu makasa a Yehova, kepabulwe padi tukamona’mba netu tubwanya kwingila mwingilo wa bupania. Nanshi kwikala bapania kwitulomba kuleka bintu bimobimo bya kungitu byabila mityima yetu, madyese aketwesela Yehova i a ntanda ne miseke.—Mit. 145:16.
KIPANGUJO 3: “Byonakidi nsongwanzele, mwanda waka mfwaninwe kumona mwingilo wa bupania bu wami wa lonso ukintengele?”
10 Pano povuya myaka yamfulo ku masomo, ulanguluka pa būmi bobe bwa kumeso. Usakanga kwikala na būmi buyampe, bwa nsangaji ne maloa. Kepabulwe padi badingidi ba masomo bakukankamikanga kutwela pa kaji ka lupeto luvule kalomba kufunda myaka mivule ku iniveleshite. Mutyima obe wa mundamunda wa bwine Kidishitu, mufundijibwe senene nao koku ukulombola’mba ufwaninwe kwiteakanya ku kwingidila Yehova kitatyi kyonso. (Mus. 12:1) Pakwabo padi ulanga kusonga nansha kusongwa ne kubunda kisaka. Lelo ukalonga’po kyepi?
11 Mbila yotyiba mu kino kitatyi kya mu būmi bobe yo ikaludika būmi bobe bonso bwa kumeso. Wivwane kodi kala Kamoni wa Yehova mwipāne ne mubatyijibwe, yuka’mba wi mwipāne kudi Yehova na muya obe onso. (Bah. 10:7) Dibajinji, ikala bidi pania mukwashi mu bula bwa kweji umo nansha mavule. Usa kutompa ku nsangaji ne ku biselwa bilupuka ku mwingilo wa bu pania walonso, ne kadi, usa kwikala na milangwe mipotoloke pa byofwaninwe kulonga na bobe būmi. Pakwabo kadi, ubulwe’po kushilula mwingilo wa bu pania walonso, pa kyaba kya kupingakenya mwingilo wa nshikije-dyuba pa mafuku akubulwa mingilo a pa kupwa kwa masomo? Banabetu bamobamo bakungilanga bidi kumeso kwa kwikala bapania bealakanyanga kyobalekele kushilula’o kumeso kwa kitatyi.
12 Shi wi nkasampe, ingidija kino kyepelo kyokidi nakyo kya bu nkungulume nansha bu nkungakaji, kwatakanya madyese obukupa a kuputumina mu busapudi bwa kitatyi kyonso. Shi udi na mutyima wa kusonga mwenda mafuku, kyalwilo kilumbuluke kya busongi kyokokeja kwala i kushilula bidi mwingilo wa bu pania walonso. Pa kwenda upya ne kutama kumushipiditu, padi ukatonga kwendelela na mwingilo wa bupania na mwine-pobe omudi nandi bitungo bimo. Bapania bamobamo besonge batwelanga mu mwingilo wa kipindi nansha wa bumishonele. Būmi bwa uno muswelo i bwa maloa abinebine.
13 Nansha shi wingile bu pania kitatyi kityetye nansha kitatyi kilampe, ukatandabwila’ko bufundiji ne kwīya bwino bukatampe bokutanapo mu mwingilo mukwabo kampanda pano pantanda. Mwingilo wa bupania witufundijanga kwikala bantu bendingile, kwilongolola, kwikala biyampe na bantu, kwiubija mudi Yehova ne kutamija kitūkijetyima ne bulumbuluke, ino yo ngikadilo itukumbanyanga mwa kuvuijija biselwa bikatampe.
14 Bantu i babulwe kikulupiji mu būmi bwabo. Kutalula’mo byobya bilaile Yehova, bintu bityetye byonka byo bījanga kitatyi kilampe. Mafuku a kumeso byoakushidile kibelo pululu, mwene kino kyo kitatyi kilumbuluke kya kulanguluka bininge pa byokalonga na bobe būmi mu myaka īya kumeso? Kwata na mutyika madyese a kwikala pania. Kukealakanyapo nansha dimo shi wingile uno mwingilo mu būmi bobe bonso.
KIPANGUJO 4: “Mbulwe kukasela nyeke mutyima kūlu mwanda wa kukimba kufikila pa kibalwa kya nsaa kitungilwe? Lelo bikekala namani shi nkifikīlepo pa kitungo kitungilwe?”
15 Yewa udinga fomu wa kulomba mwingilo wa bu pania walonso ufwaninwe kulondolola ku kino kipangujo kilonda’ko: “Lelo kodi mwilongolole mwa kufikila biyampe pa kitungo kya nsaa 1 000 pa mwaka?” Pa kufikila’po, kilomba kupityija nsaa isatu ku difuku mu busapudi. I bine kino kilombanga mpangiko miyampe ne kwidingila. Bapania bavule baloñanga myeji mityetye yonka betūdila’ko kala mwingidijijo wa kitatyi mufwaninwe, muyampe senene.
16 Musapudi 9:11 unene byabine: ‘Kitatyi ne myanda yampikwa kulaya bifikilanga bonso.’ Misongo mikatampe nansha bimyanda kampanda bikwabo bya mu kitulumukila bibwanya kubudija pania kufikila pa kitungo kyandi. Shi makambakano akutene i a kitatyi kityetye, pakwabo ku ngalwilo kwa mwaka wa mingilo, kilomba’tu kuvudija nsaa mu mpangiko mwa kukūdila kitatyi kijimine. Ino bikekala namani shi kubalupuka makambakano makatampe, ino ako kushale’nka myeji mityetye mwaka wa mingilo upwe, ne mwa kukūdila kitatyi kijimine mukomo?
17 Shi ubabela mu bula bwa myeji kampanda, nansha shi na buluji bwendele’mo bwa mwanda wakufikila, ubatunya kufikila pa kitungo kya nsaa, ukokeja kwisambila’po na muntu wa mu Komite wa Mingilo wa pa kipwilo kyenu, wamushintulwila ngikadilo yodi’mo. Shi bakulumpe abamone’mba bibwanika kukuleka wendelele na mwingilo obe pakubulwa kusela mutyima kūlu wa kukimba kubwanya nsaa yojimije, babwanya kutyiba ino mbila. Mulembi ukalombola pa fishi wa mwingilo wa musapudi amba kunenwepo kubwanya kitatyi kijimine. Kino kekishintululapo’mba ubapebwa konje, ino i kulombola kobakulombola kanye ka pa bula, mwendele byamalwa byakutene.—Tala Mwingilo Wetu wa Bulopwe wa Kweji 5, 1987, p. 3, musāngo 7, Falanse.
18 Bapania babwino balwilanga’ko kutūla nsaa mivule pobakidi ku ngalwilo kwa mwaka wa mingilo. Batūlanga mwingilo wa bupania pa kifuko kibajinji, o mwanda dimodimo batyepejanga mingilo yabo ya mvubu mityetye. Ekale pania watyelewa na nsaa pa mwanda wa kwilongolola kwandi kubi nansha pa mwanda wa kubulwa kwidingila mwa kulēmekela mpangiko yandi, ufwaninwe kulonga buninge bwa kukūla kitatyi kyandi kyajimina pakubulwa kulanga’mba bakamulekela’yo mu muswelo kampanda.
19 Dimodimo, ngikadilo ya pania ibwanya kwalamuka, byakoma ne mwa kulongela mwine. Padi kakabwanyapo kufikila pa kibalwa kya nsaa kitungilwe mu bula bwa kitatyi kilampe pa kulēmenenwa na misongo yendelela, na biselwa bikatampe bya kisaka, ne bikwabo. Pa kino, dishinda dya tunangu i kujokela bidi ku bu musapudi, na kwingila’ko mwingilo wa bupania mukwashi ponso pamweka mukenga. I kutupu mpangiko kampanda ikwetwe ya kushiya kansangwa mu mulongo wa bapania shi ngikadilo yadi’mo keimushilapo kyaba kya kufikila pa kitungo kitungilwe.
20 Tukulupile’mba mpangiko ilomba kuta mutyima bininge ku boba babwanya bisakibwa ikatonona bavule bashilule uno mwingilo pambulwa kusela mutyima kūlu byabitupu. Kino kikankamika ne boba badi kala mu mwingilo wa kitatyi kyonso bendelele na mwingilo wabo. Kyotusaka i bapania babwanye mwingilo wabo.
KIPANGUJO 5: “Nsakanga kuvuija kintu kampanda mu mwingilo ne kwikala na nsangaji ya kwikivuija. Lelo mwingilo wa bupania usa kumpa ino nsangaji?”
21 Nsangaji yabine imanine nakampata pa kipwano kiloe kipwene umo ne umo na Yehova, ne pa kusumininwa kotusumininwe kumwingidila na kikōkeji. Yesu wāūminine pa mutyi wa masusu ‘pa mwanda wa nsangaji yadi imutūdilwe kumeso.’ (Bah. 12:2) Kulonga kiswamutyima kya Leza kwādi kumupa nsangaji. (Mit. 40:8) Netu tubwanya kutana nsangaji yabine mu ngikadilo ya bintu ya dyalelo poso shi bintu bivule byotulonga i bikwatañane na mutōtelo otutōta Yehova. Bintu bya kumushipiditu byotulonga bitupanga kitungo kampanda umbūmi, mwanda tukulupile na bubine’mba i byoloke. Mu kupāna mo mumwenwanga nsangaji, kadi i kutupu muswelo mulumbuluke otukokeja kwipāna batwe bene utabukile kufundija bakwabo dishinda dya kukamona būmi bwanyeke mu ntanda impya ya Leza.—Bil. 20:35.
22 Pania utelelwe mu musāngo umbajinji wekishintulwile’mba: “Lelo kudi’po kadi nsangaji mikwabo itabukile ya kumona muntu owifunda nandi waikala ke mutendedi mupyasakane wa Yehova? I kintu kitenga ku mutyima kadi kikankamika lwitabijo, pa kumona mutonwena Kinenwa kya Leza bantu baalamuna būmi bwabo mwanda wa kusangaja Yehova.” (Tala Kiteba kya Mulami kya 1 Kweji 11, 1997, paje 14-19.) Shi ke pano, i kika kikupanga nsangaji? Shi utonge kulonga bukomo bwaendaenda, bumwenwa’mo kamweno, pa kyaba kya kukimba nsangaji ya lupito ya ino ntanda, nankyo mwingilo wa bupania ukakupa nsangaji mikatampe ne maloa abinebine mu būmi bobe.
KIPANGUJO 6: “Byokekilombepo’nka kwikala pania mwanda wa kukamona būmi bwanyeke, kutyiba mbila ya kwikala nansha kuleka kwikala pania mwene kuntala kasuku kami?”
23 I kyabine, kutyiba mbila ya kwikala pania kukutala kasuku kobe. Yehova bunka bwandi ye uyukile ngikadilo yodi’mo. (Loma 14:4) Aye usakanga umwingidile na mutyima obe onso, na muya obe onso, na mushipiditu obe onso ne na bukomo bobe bonso. (Mako 12:30; Ngat. 6:4, 5) Yehova usenswe yewa upāna na tusepo, umwingidila na nsangaji, ke na kwiuningapo nansha na mutyima kanyonga. (2 Kod. 9:7; Kol. 3:23) Buswe bosenswe Yehova ne muntu nobe bo bufwaninwe kukutonona wingile mwingilo wa kitatyi kyonso. (Mat. 9:36-38; Mako 12:30, 31) Ekale wiivwana uno muswelo, nankyo languluka byabinebine pa mwingilo wa bupania.
24 Tukulupile’mba myanda yonso yanenwa’i ikakukwasha wibandaule shi ubwanya kwikala pania. Lelo ukokeja kwilongolola wikale pania walonso? Usa kutana kunshi’ku kalandadiye kanena’mba, “Mwingidijijo wa Kitatyi wa Pania wa ku Yenga.” Languluka pa mwingidijijo wa kitatyi ukakwitaba senene, ukakushila kyaba kya kufikila pa nsaa 23 ku yenga mu busapudi. Kupwa ikala na lwitabijo mudi Yehova ne kutūla kikulupiji mwadi. Ukokeja kubwanya na bukwashi bwandi! Mwanda Yehova ulaile’mba: ‘Nkemupungulwila madyese kufika’nka ne byomukatondwa.’—Mal. 3:10.
25 Shi ke pano, tubaipangula monka: “Mwingilo wa bupania, lelo wiubwanya ne abe?” Shi ubalondolola’mba “eyo,” nankyo ne kwija kwine mpika, witūdile difuku dyokashilula mwingilo wa bu pania walonso, kadi kulupila’mba Yehova ukakwesela na kukupa būmi bwansangaji!
[Binenwa bya Kifwatulo pa paje 6]
[Kapango pa paje 6]
Mwingidijijo wa Kitatyi wa Pania wa ku Yenga
DYA MWANZO DYA BUBIDI DYA BUSATU DYA BUNÁ DYA BUTANO DYA MPOSO DYA YENGA
Lubanga Lubanga Lubanga Lubanga Lubanga Lubanga Lubanga
busapudi busapudi busapudi busapudi busapudi busapudi busapudi
Kyolwa Kyolwa Kyolwa Kyolwa Kyolwa Kyolwa Kyolwa
busapudi busapudi busapudi busapudi busapudi busapudi busapudi
Ku Kyolwa Ku Kyolwa Ku Kyolwa Ku Kyolwa Ku Kyolwa Ku Kyolwa Ku Kyolwa
busapudi busapudi busapudi busapudi busapudi busapudi busapudi
Lemba na kidiyo mpangiko yobe ya difuku ne difuku dya mu yenga.
Witungile kufikila pa nsaa 23 mu busapudi ku yenga ne yenga. Buvule bonso bwa nsaa ku yenga ____________________