“Ukokeja Kwikala Pania wa Binebine!”
1. Lelo kaka umo wamwene namani mwingilo wandi wa bupania?
1 Kathe Palm wanene amba: “Nkyamwenepo mwingilo mukwabo wadi ubwanya kumpa nsangaji mikatampe ne madyese a ku mushipiditu.” Uno kaka waingile bu pania wampikwa mwino mu makumi a myaka, usapula mu Shili ense mfulo na mfulo, mu Amerika wa Kunshi. Kupwa kulangulukila pa būmi bwa madyese budi na boba badi mu mwingilo wa kitatyi kyonso, padi bamo ke bakunene amba: “Ukokeja kwikala pania wa binebine!”
2. Shintulula mwanda waka nsangaji ya bine itambanga mu mingilo ya ku mushipiditu.
2 Būmi bwa Kuloelelwa: Yesu, Kimfwa kyetu wādi uloelelwa kulonga kiswa-mutyima kya Shandi. (Yoa. 4:34) O mwanda Yesu kādipo na budimbidimbi pa kufundija bandi bana ba bwanga amba nsangaji ya binebine itambanga ku kwipāna mu mingilo ya mu butōtyi bwa Yehova. Tusangalanga potudi na būmi buyule mingilo ilengeja twitabijibwe na Yehova. Kadi, nsangaji yetu ivulanga potupāna kitatyi kikatampe, bukomo, ne bituntwa mwanda wa kukwasha bakwabo.—Bil. 20:31, 35.
3. Lelo i nsangaji’ka yotukemwena mu kupityija kitatyi kivule mu busapudi?
3 Shi tupityija kitatyi kivule mu busapudi, tukekala na mikenga ya kwimwena nsangaji ya kwendeja bifundwa bya Bible. Nansha mu bifuko mudi bantu ba bujundu, tubwanya kumona’mba mwaba wetu i muyampe kupita motwadi tulangila, ponso potwenda twibidila ne kutamija bwino mu busapudi. Bapania bapityije mwaka mu mwingilo babwanya kwingidija bupeta bwa bufundiji bobatambwile ku Masomo a Mwingilo wa Bapania. (2 Tem. 2:15) Shi tutakamane, tukakuna biyampe nkunwa ya bubinebine ikapa bipa mwenda mafuku.—Mus. 11:6.
4. Lelo bankasampe badi pabwipi na kupwa masomo bakalangulukila pa bika?
4 Bankasampe: Pomusa kupwa masomo a sekondele, le ke mudi balangulukile pa mafuku a kumeso? Kufika ne pano, mpangiko yobe ilondanga mingilo ya ku masomo. Le umona namani posa kupwija? Pa kyaba kya kulondalonda twaji twa ntanda, wabulwa’po kwitungila kitungo kya kwingila bu pania ne kulombela ponka? Bwino bokekala nabo—pofundija bantu ba ngikadila palapala, unekenya bijika, utamija kwīfula, ne bwino bwa kufundija—bukakukwasha mu būmi bobe bonso.
5. Le bambutwile ne kipwilo bakakankamika namani mwingilo wa bupania?
5 A bambutwile, lelo muloñanga bukomo bwa kuludikila benu bana ku mwingilo wa kitatyi kyonso? Binenwa byenu ne kimfwa kilumbuluke bikebakwasha bininge batūle tumweno twa Bulopwe pa kifuko kibajinji. (Mat. 6:33) Ray, washilwile bupania pa kupwa’tu kwa masomo a sekondele, uvuluka’mba: “Mama wadi nyeke umona amba bupania bo buleta nsangaji mikatampe mu būmi.” Bonso mu kipwilo bakokeja kukankamika mu binenwa ne kukwatakanya mwingilo wa bupania. Jose, wa mu Eshipanye, unena’mba: “Kipwilo kyetu kyadi kilombola bankasampe amba bupania i mwingilo muyampe kutabuka mu būmi. Binenwa byabo ne mutyika obadi bakwete nao mwingilo wa bupania pamo ne bukwashi bwabo byalengeje mpēlelwe kushilula bupania.”
6. I bika byotukalonga shi pano’ko bidi ketudipo na mutyima wa kwingila bupania?
6 Kunekenya Bijika: Le bikekala namani shi unena’mba, ‘Nkisakilepo kwingila bu pania’? Shi ye mowiivwaninanga, lombola Yehova mu milombelo muswelo mowiivwanina, na kumusapwila amba, ‘Nkiyukilepo shi bupania bumfwaninwe, ino nkimbanga kulonga bintu bikusangaja ku mutyima.’ (Mit. 62:8; Nk. 23:26) Kupwa kimba bwendeji bwandi kupityila ku Kinenwa ne bulongolodi bwandi. Bapania bavule ba kitatyi kyonso ‘batompele’ dibajinji kwingila bu pania mukwashi, nsangaji yobemwenine’mo yebatonwene balondelonde mu būmi mwingilo wa kitatyi kyonso.—Mit. 34:8.
7. I muswelo’ka otubwanya kukomena malangalanga a mwa kubwaninya mansaa 70 kweji ne kweji?
7 Le bikekala namani shi ulangalanga’mba kubwanyapo kufikila pa mansaa 70 kweji ne kweji? Wabulwa’po kwisamba na bapania badi mu ngikadilo na yobe? (Nk. 15:22) Kupwa soneka miswelo palapala ya mwa kwingidila yobwanya. Shi ukūle kitatyi kyowadi wela ku bintu bya mvubu mityetye, ukamona amba mwingilo ukakupēlela kupita ne mowadi ulangila.—Ef. 5:15, 16.
8. Mwanda waka tufwaninwe kyaba ne kyaba kubandaula ngikadilo yotudi’mo?
8 Wibandaule Monka: Divule ngikadilo idi’mo muntu ishintanga. I biyampe kubandaula ngikadilo yodi’mo kyaba ne kyaba. Kimfwa, le kodi kubwipi na kuleka kaji? Randy, walekele kaji panopano unena’mba: “Buno butyibi bwankweshe nshilule kwingila bupania wa lonso na wami mukaji, ne bwampele mukenga wa kuviluka ne kukengila kokwa kusakilwa mpata bukwashi. Namwene madyese keabadika mu butyibi bwami, ino dyese dikatampe kutabuka onso i mutyima wa mundamunda muyampe.”
9. Lelo balume ne bakaji bafwaninwe kubandaula bika?
9 Balume ne bakaji bamo, pa kupwa kwibandaula na katentekeji, bamwene amba kebabwanyapo kwingila bonso babidi mwingilo wa kitatyi kyonso. Bine, padi kino kilomba kupēleja būmi bwa kisaka, ino mu kwipāna mudi kamweno. John, wa mukaji walekele kaji ka kashinde-dyuba mwanda wa kutandabula mwingilo wandi, unena’mba: “Kekudipo nsangaji na ino ya kuyuka’mba mukajami i mwielelele mu bintu bya ku mushipiditu dyuba dyonso.”
10. I bika bilengeja Bene Kidishitu babandaule mwingilo wa bupania?
10 Kilomboji kya Buswe ne Lwitabijo: Yehova utūdile mwingilo wa busapudi ke wa mvubu mikatampe kutabuka yonso yotukokeja kwingila. Panopano ponka, ino ngikadilo minunu isa konakanibwa, ne enka boba beta pa dijina dya Yehova bo bakapanda. (Loma 10:13) Mutyima wa buswe botumuswele ne wa kufwija’ko pa byetulongēle witulengeja tukōkele ku mwingilo witupēle wandi Mwana wa kusapula na bupyasakane. (Mat. 28:19, 20; 1 Yoa. 5:3) Kadi, lwitabijo mu bubine bwa amba tudi mu mafuku a ku mfulo luketutonona tulonge byonso byotubwanya mu mwingilo pano pakidi mema mu manwi, pa kyaba kya kumwena mu ntanda ne pa mfulo.—1 Kod. 7:29-31.
11. Le tukamona namani muntu witulombola amba tukokeja kwikala bapania ba binebine?
11 Kwingila bu pania ke kwitabijapo bitupu mpangiko ya bulongolodi; ino i kilomboji kya kwipāna kudi Leza. O mwanda shi muntu wakusapwila amba ukokeja kwikala pania wa binebine, mumone bu ukusakilanga biyampe. Kadi bandaula mu milombelo umone kwilunga na boba bengila uno mwingilo usangaja.
[Bushintuludi pa paje 4]
A bambutwile, lelo muloñanga bukomo bwa kuludikila benu bana ku mwingilo wa kitatyi kyonso?
[Bushintuludi pa paje 5]
Yehova utūdile mwingilo wa busapudi ke wa mvubu mikatampe kutabuka yonso yotukokeja kwingila.