Kino Kyo Kitatyi kya Kusapula!

1. Mwanda waka kino kyo kitatyi kya kusapula?

¹ “Akamwai Leza mumutumbike ntumbo.” Uno musapu, uludikwa na mwikeulu, usapulwanga ku “mizo yonso, ne bisaka byonso, ne ndimi yonso, ne bantu bonso bēne kumo.” Mwanda waka? Mwanda “kitatyi kya kidye kyandi [Leza] kibafika.” Dyalelo, tudi mu “kitatyi kya kidye” kikanana na konakanibwa kwa ino ngikadilo ya bintu. Nanshi i kya kamweno bantu batōte yewa “wāpangile diulu, ne ntanda, ne mema, ne pansulo pa mema.” Kekudipo mwingilo mukwabo wingilwa dyalelo udi na mvubu ne wa kampeja-bukidi pamo na uno wa kusapula “myanda-miyampe ya nyeke.” Eyo, kino kyo kitatyi kya kusapula!​—Kus. 14:6, 7.

2. Le bengidi ba Yehova i balombole namani amba bino byo bitatyi bya kupelakana nabyo?

² Myaka dikumi kunyuma, bengidi ba Yehova bapityije kubwipi kwa nsaa midiyala 12 mu mwingilo wa kusapula Bulopwe ne kulonga bana ba bwanga. Bavule basendulwile būmi bwabo mwanda wa kutambila ne pa mfulo mu uno mwingilo wa mwangulo wa ku mushipiditu. (Mat. 9:37, 38) Kimfwa, mwaka wadi’mo, mwayene wa basapudi 850000 ne bya pangala baingile bu bapania kweji ne kweji. Ku bapania ba lonso, kino kyadi kibalomba kusapula mwayene wa nsaa 70 ku kweji ne kweji. Ino ku bapania bakwashi, i nsaa 50.

3. I kwisendulula’ka kumo kwisendululanga basapudi mwanda wa kwingila bupania?

³ Mwa Kwingidila Bupania: Bapania bayukile amba “mwaka ubaī,” o mwanda balonga bukomo bwa kupēleja būmi bwabo. (1 Kod. 7:29, 31) Bakimbanga miswelo ya kutyepeja milupu ya lupeto mwa kupityijija nsaa mityetye mu kaji ka ngitu. Kimfwa, bamo i bavilukile mu mobo matyetye. Bakwabo nabo i bafundule bituntwa byampikwa mvubu. (Mat. 6:19-21) Divule, balekanga ne kulonda tumweno twa kwisakila. Byonso bino mwanda wa kwipāna nsaa mivule mu mwingilo. (Ef. 5:15, 16) Basapudi bavule batandikanga mpangiko ibakwasha bekale bapania na kininga, na mushipiditu wa kwisuminwa, koku kadi bakulupile na milombelo mudi Yehova.

4. I matabula’ka akokeja kukukwasha ufikile pa kitungo kya kwingila bupania?

⁴ Le ubwanya kwingila bupania? Mwene ubwanya kwipangula bapania muswelo obabwanyanga kwibwingila? Ingila pamo nabo mu mwingilo wa budimi, bine ukamona nsangaji yobadi nayo. Tanga bishinte bitala pa bupania bilupulwa mu mabuku etu. Witungile kitungo kya ditabula ne ditabula ditwala ku mwingilo wa bupania. Shi kudi bikoleja bikukankaja kwingila bupania pano, nabya tūla’byo kudi Yehova mu milombelo, kadi mulombe bukwashi bwa mwa kupwijija’byo.​—Nk. 16:3.

5. Bupania bwitukwashanga namani mu kulumbulula bwino bwetu mu mwingilo?

⁵ Byabuyabuya ne Nsangaji: Bupania bunonanga bwino bwetu bwa kwingidija Kinenwa kya Leza, ne kino kiletanga nsangaji mivule. “Kwingidija Kinenwa kya Leza kya bubinebine mokyolokele i dyese dikata,” mo munenena kaka umo pania nkasampe. “Shi wingila bupania, ukengidija Bible divule dine. Pano shi keñenda ku kibelo ne kibelo, ndyukile kala bisonekwa bifwaninwe ku mwinē njibo umo ne umo.”​—2 Tem. 2:15.

6. Bupania bupānanga bufundiji’ka?

⁶ Kadi bupania bwitufundijanga manwa mavule umbūmi. Bukokeja kukwasha nkasampe ayuke kwingidija musokwe wandi na tunangu, mwa kulupwila lupeto, ne mwa kwikadila na bantu. Bavule bekalanga na mumweno wa ku mushipiditu muyampe mwanda wa kwingila kobengile bupania. (Ef. 4:13) Pakwabo kadi, bapania badi divule na madyese a kumona bukwashi bwa Yehova ku wabo mutamba.​—Bil. 11:21; Fid. 4:11-13.

7. Le bupania bwitukwasha namani tufwene kudi Yehova?

⁷ Padi dyese dipityile bukata mu bupania i kwitukwasha kobwitukwasha tufwene kudi Yehova. Kino kitukwatakanyanga mu matompo. Kaka umo wāūminine makambakano makomo kyaba kilampe wānene’mba: “Kipwano kya mpwaninine kyonadi nakyo na Yehova mu mwingilo wami wa bu pania kyo kyaunkweshe ntyumwine umanwi.” Wābwejeje’ko amba: “Ndi na katōkwe mwanda ne mupityije bukulu bwami bonso mu kwingidila Yehova kitatyi kyonso. Nadi mwipāne mu muswelo onkyadipo nanga amba mbwanya.” (Bil. 20:35) Shi ke pano, netu twimwenei madyese a ntanda ne miseke pa kwipāna mu mwingilo wa mvubu wa kusapula.​—Nk. 10:22.