Lelo Ubwanya Kutwela pa “Kibelo Kikatampe kya Mīngilo”?
1. Lelo “kibelo kikatampe kya mīngilo” kitushitwidilwe i kibelo’ka?
1 Pāshitwidilwe mutumibwa Polo “kibelo kikatampe kya mīngilo,” wāmwene uno bu mukenga wa kwendeleja tumweno twa Bulopwe kumeso nansha byaādi utana balwana bavule. Dyalelo basapudi ba Bulopwe 642000 kujokoloka ntanda yonso ibatwele pa kibelo kikatampe kya mingilo na kwingila bu bapania ba lonso.
2. Mwanda waka i biyampe kubandaula ngikadilo yetu kitatyi ne kitatyi?
2 Ngikadilo Ishintanga: Nansha ngikadilo ya umo ne umo byoikokeja kwimika mwingilo wa muntu, ngikadilo’i ikalanga ishinta. O mwanda nanshi i biyampe muntu ne muntu abandaule ngikadilo yandi kitatyi ne kitatyi pampikwa kwilaija enka pakanengela bintu. (Mus. 11:4) Lelo wi nkasampe kasa kupwija sekondele panopano? Le wi mbutwile udi na bana bashilula kwenda ku masomo? Lelo kodi pabwipi na kutambula pasho ku kaji? Kuno kushinta kukokeja kukushila kyaba kya kwingila mwingilo wa bu pania. Kaka umo wadi ukambakanibwa na misongo watyibile butyibi bwa kwingila bu pania aye papo na myaka 89. Mwanda waka? Mwanda katwelelepo mu lupitalo umbula bwa mwaka umo, penepa wamona amba kino kyo kitatyi kya kwingila bu pania.
3. Lelo i kushinta’ka kwashintyile bamo mwa kwingidila bu pania wa lonso?
3 Kimfwa bidi Polo, wāsakile bidi kukapempula banababo ba mu Kodinda. Ino wāsendulula mpangiko yandi pa mwanda wa myanda miyampe. Bavule bengila bu bapania balonso dyalelo, nabo byadi bibalomba kusendulula mpangiko yabo mwa kwingidila’bo biyampe. Bakwabo bapēleje būmi bwabo na kwingila kaji ka nsaa mityetye mwa kumwena’nka twa kwikwasha nato mu būmi. I batane nsangaji mu madyese abo a mwingilo. (1 Tem. 6:6-8) Ba mulume ne mukaji bamo bashintyile mwikadilo, beimvwanika’mba mulume ende ku kaji, kino kyalengeja mukaji engile bu pania.
4. Lelo tukalonga bika shi tumona’mba ketukafikilapo pa mansaa alombelwe?
4 Kokapelakana kutalula mu ñeni mulangwe wa kwingila bu pania na kwakamwa’mba kukabwanyapo mansaa, mhm. Nsaa’tu ibidi ne kipindi difuku ne difuku i mibwane. Shi umona’mba kubwanya’byopo, tompa bupania mukwashi kweji umo nansha abidi na kitungo kya kusapula nsaa 70. Kino kikakukwasha wimwene nsangaji idi mu bupania. (Mit. 34:8) Wisambe na boba bengila kala bupania. E bano ke balwe na bikoleja pamo bwa byobe. (Nk. 15:22) Lomba Yehova akwesele mu bukomo bolonga bwa kutandabula mwingilo obe.—1 Yoa. 5:14.
5. Mwanda waka bu pania wa lonso i mwingilo mulumbuluke?
5 Mwingilo Mulumbuluke: Kwingila bu pania wa lonso kuletanga mpalo mivule. Kukakukwasha wimwene dyese dikatampe ditamba mu kupāna bivule. (Bil. 20:35) Bupania bukakupa busendwe bwa kwingidija Kinenwa kya Leza kya bubinebine monka mokyolokele. (2 Tem. 2:15) Bukakupela’ko kadi mikenga mikwabo ya kumona mwingidila kuboko kwa Yehova modi. (Bil. 11:21; Fid. 4:11-13) Bupania bukakukwasha kadi utamije ngikadila ya ku mushipiditu, kimfwa kūminina, ne kukufwenya kubwipi na Yehova. (Yak. 4:8) Lelo ubwanya kutwela pa kino kibelo kikatampe kya mingilo na kwingila bu pania wa lonso?