Lelo Wādi ne Bupania wa Lonso?
1. Lelo bantu bavule baikele na dyese’ka, ino bamo bafudile ku bika?
1 Bantu bavule baikele na dyese dya “kufundija ne kusapula Myanda Miyampe” mu bula bwa myaka. (Bil. 5:42 Myanda Miyampe ku Bonso) Inoko, bamo balekele’byo kwingila bu pania pa mwanda wa bubinga palapala. Shi wāikele ne bu pania wa lonso, wabulwa’po kubandaula monka ngikadilo yokodi’mo mwa kuyukila shi ubwanya kwilunga monka ku mulongo wa bapania?
2. Mwanda waka boba baingile bupania pa kala bafwaninwe kubandaula monka ngikadilo yokebadi’mo dyalelo?
2 Ngikadilo Ishintanga: Padi ngikadilo yakulengeje uleke bupania keikidikopo. Kimfwa, shi walekele bupania mwanda wakubulwa kubwanya nsaa 90 ilombelwe ku Kweji, ubulwe’po kushilula monka pano patyepejibwa nsaa ilombelwe ke nsaa 70 ku Kweji? Le bisakibwa bya kobe kaji ne biselwa bya kyobe kisaka byatyepele powalekele mwingilo wa bupania? Kaka umo wālekele mwingilo wa bupania mwanda wa misongo wabwenye kwibushilula monka aye kadi na myaka 89. Katwelelepo mu lupitalo umbula bwa mwaka umo, penepa wamona amba kino kyo kitatyi kya kwingila monka bupania!
3. Le bantu ba mu kisaka bakengidila pamo namani mwanda wa kukwasha umo mu kyabo kisaka engile bu pania?
3 Padi kwāingilepo bu pania pa kala, inoko umo wa mu kyenu kisaka walekele mwingilo wa bupania mwanda wa kulela muntu umo wa mu kisaka, kimfwa mbutwile ke mununu. (1 Tem. 5:4, 8) Shi i amo, ubulwe’po abe nansha bakwabo ba mu kisaka kulonga bukomo bwa kukwasha yewa walekele bu pania? Le mubulwe’po kwisambila myanda pamo? (Nk. 15:22) Shi bantu ba mu kisaka bengidila pamo mwanda wa muntu umo mu kisaka engile bupania, bonso bakokeja kwiivwana’nka na abo bengila’bo.
4. Le i bika byokalonga shi kudipo na bukomo bwa kwingila monka bu pania mu kino kitatyi?
4 Shi ngikadilo yodi’mo dyalelo keikulengejapo ushilule monka bu pania, kokatyumukwa mutyima. Mutyima obe wa kwingila usangajanga Yehova. (2 Kod. 8:12) Ingidija mu mwingilo obe wa dyalelo bwino bowatambwile powadi pania. Tūla kusakasaka kobe mu milombelo, ne kukimba mikenga ya kulumbulula ngikadilo yodi’mo. (1 Yoa. 5:14) Padi, kyaba kimo, Yehova ukakushitwila “kibelo kikatampe kya mīngilo milumbuluke” mwanda wa wimwene monka nsangaji idi mu mwingilo wa bupania wa lonso!—1 Kod. 16:9.