Twingidijei Mikanda Mwanda Wa Kutenga Ñeni Ne Mutyima
1 Bubinebine bwa Bible bufwaninwe kupānwa mu muswelo utenga ñeni ne mutyima. Pādi palombola Yesu bubinebine ku bemvwaniki bandi, wādi utonga myanda ibasangaja ne ibakunka ku mityima. (Luka 24:17, 27, 32, 45) Kubwanya kwetu mu uno mwingilo kwimanine nakampata pa bukomo botulonga mwanda wa kujingulula bisakibwa bya kumushipiditu bya bemvwaniki betu.
2 Mikanda ikokeja kwikala bingidilwa bifwaninwe mwanda wa kutenga ñeni ne mityima ya boba botutana mu mwingilo. Dibajinji langa i bāni babwanya kwitaba ku musapu udi mu mukanda ne mukanda unenwe kupānwa mu Kweji 9:
—Dieu se soucie-t-il vraiment de nous? Bantu badi na makambakano a lupeto nansha boba baikele kufikilwa na kyamalwa bakasangela uno musapu usenga wisambila pa mafuku a kumeso akubulwa masusu.
—Quel est le but de la vie? Comment le découvrir? Bankasampe balanguluka bikatampe pa mafuku abo a kumeso bakamwena kamweno mu malondololo emanine pa Bible adi mu uno mukanda.
—Ikalai ne bumi bwa nsangaji ya nyeke pano pa ntanda! Bifwatulo bivule ne bisonekwa bitelelwe’mo bikakwasha banuke ne boba kebayukile kutanga senene bemvwanije mpango ya Leza.
—Umbikalo ukatulako Paladisa. Muntu yense wingila mwingilo utala pa buludiki nansha pa mushikatyilo wa umbūmi wa mu kikonge ubwanya kukokwa na uno musapu wa’mba Bulopwe bwa Leza bukapwija makambakano ekonda na bantu.
—Kitatyi Kifwa Muntu Osenswe. . . Bantu bavule bemaninanga myanda ya mfu basangelanga kwikala na uno mukanda ku makasa mwa kukwashisha bisaka bifwidilwe. Basapudi basapula ku malalo bengidijanga uno mukanda mwanda wa kusenga bantu badila. Bakaka babidi baikele kobolola nao kisaka kya bantu basamba-babidi badi balombela ku kibundu. Kipa kyalupukile ku kuleta musapu usenga udi mu uno mukanda, i kifundwa kya Bible kyashilwilwe na inabana mu difuku dyalondele’po!
—Lelo Ukakulupila mu Busatu-busantu? Muntu ulamete bininge ku myanda ya mutōtelo ukokeja kwitaba senene ku bubinebine budi mu uno mukanda ulombola lukulupilo lwa pa kitako lwa Bipwilo bya Ki-kidishitu.
3 Yuka senene myanda idi mu mukanda ne mukanda, ne kujingulula muswelo mulumbuluke wa kwiingidija mu wenu mwaba. Shi usaka madingi a mwa kwiipānina, tala paje wa munyuma wa Mwingilo Wetu wa Bulopwe wa Kweji 8, 1998. Tulomba Yehova esele bukomo bomulonga mwanda wa kutenga ñeni ne mityima ya bantu.—Mako 6:34.