Bapania Bakwasha Bakwabo
1 Yesu wānene’mba: “Budimi bwa kwangula i bukata, nanshi bakwangula bo batyetye, ino nanshi mwikale kwisashilapo mwine wakwangwilwa atalule bakwangula bāye kwangula budimi bwandi.” Kibalwa kya bangudi kyādi kityetye mu myaka katwa imbajinji inoko mwaba wa kwangula’mo mukatampe, nanshi Yesu wādi wa kwibatuma umo umo mwa kufikila bantu bavule na myanda miyampe. Ino kālongelepo namino, aye “webabadikija babidi babidi.” (Luka 10:1, 2, MB) Mwanda waka wēbatumine babidi babidi?
2 Bana-babwanga bādi bakidi bapya, kebapotolwele’byo biyampe. Mu kwingidila pamo mo mobādi ba kwifundila bivule ku bakwabo ne kwikankamika umo ne mukwabo. Kidi enka na mwēkinenene Salomone amba “babidi batabukile umo kunengela.” (Mus. 4:9, 10) Nansha ke pāpwile kupungululwa mushipiditu sandu mu dya Pentekosa wa 33 K.K., ba Polo, Banabasa, ne bakwabo bātwele balunda nabo mu lwitabijo mu mwingilo. (Bil. 15:35) Bine, boba bāfundijibwe na bano bana-balume bipanda bādi ba dyese ne dyese’po!
3 Mpangiko Milumbuluke ya Bufundiji: Kipwilo kya bwine Kidishitu kya dyalelo nakyo i kilongolwelwe kusapula pamo na mwādi mulongolwedilwe kya mu myaka katwa imbajinji kilondelwanga’po. Kitupanga bufundiji. Umo ne umo motudi ufwaninwe kuvuluka nyeke amba unenwe kuyukanya myanda miyampe na musapwilo mushikate. O mwanda kwakwetwe mpangiko ya buno bukwashi, mwanda wa basapudi bavule bekale kulumbulula bwino bwabo mu mwingilo.
4 Ku Masomo a Mwingilo wa Bulopwe afundilwe panopano, Sosiete wayukenye’ko mpangiko ya kukwasha bapania bakwabo mu mwingilo. Lelo kudi buluji busakilwa buno bukwashi? Eyo, budi’ko. Mu myaka isatu yapityile’i, kwabatyijibwe basapudi mudiyo umo ne kupita, bavule mu bano basapudi basakilwa bufundiji mwanda wa bekale na bwino bushikate mu busapudi. Ino i bāni bakokeja kwitwa bāye bakwashe bakwabo?
5 Bapania babwanya kukwasha. Bulongolodi bwa Yehova bwibapanga madingi mavulevule ne bufundiji. Bapania bapebwanga bulombodi bukwatañene na bisakibwa byabo ku Masomo a Bapania obafundanga mu mayenga abidi. Kadi bamwenanga biyampe mu kubungakana kobabungakananga na batadi ba bipindi ne ba madistrike, ne mu madingi ebapanga bakulumpe. Eyo, ke kunenapo’mba bapania bonso bapotolwele mingilo pamo na mwādi mupotolwedile’yo ba Polo ne Banabasa, inoko nabo bapebwanga bufundiji bushimate, bobasangela kupāna ku bakwabo.
6 I Bāni Bakamwena’mo Biyampe? Le ino mpangiko itala’nka basapudi bapya ne boba babatyijibwe panopano? Mhm! Kudi bankasampe ne batame bayukile bubinebine tamba myaka mivule, ino nabo bakasangela kupebwa bukwashi mu bipindi bimobimo bya mwingilo. Bamo bengilanga mwingilo mulumbuluke, bapāna mabuku mavule, ino badi na makambakano pa kulonga kujokela’mo kupya nansha kushilula bifundwa bya Bible. Bakwabo bashilula ne bifundwa bya Bible, ino befundi bobefunda nabo kwendelela’bo kumeso mpika. Le kyokebendelelanga nabo kulampe i kika? I biyampe kwipangula bapania babwino, babwanya kukwasha mu myanda ya uno muswelo. Bapania bamobamo bapēlelwanga kutamija kusepelela kwa bantu, kushilula bifundwa bya Bible, ne kuludikila befundi ku bulongolodi. Kupotolola mwingilo kwabo kukekala na bukwashi mu ino mpangiko impya.
7 Lelo ulanga mingilo yobe keikushidilepo kyaba kya kukwatakanya kukongakana kwa pa kipwilo kwa kwenda mu busapudi mungya mosakila? Shi i amo, nankyo pania umo ukokeja kusapula nobe mu bitatyi byosaka bikalanga basapudi bakwabo kutupu’bo.
8 Kwingidila Pamo Kudi na Mvubu: Bakulumpe bakakwata mpangiko misunsa ibidi pa mwaka ya kukwasha basapudi basakile bukwashi bwa bunka na ino mpangiko ya Bapania Bakwasha Bakwabo. Shi ubaitabija buno bukwashi, nankyo mwisambei na pania upelwe kiselwa kya kukukwasha, mwitungilei nandi bitatyi biyampe bya kutambila mu busapudi; kadi londai’byo senene. Lēmekai kilayeno ne kilayeno. Kitatyi kyomwingidila pamo, kwata misapwilo mishikate ya mwa kusapwila myanda miyampe. Languluka kilupwilanga misapwilo kampanda bipa biyampe. Kwata madingi akupa pania a kuneñenya misapwilo yobe. Shi wingidije bintu byowifunda, nankyo kwendelela kobe kukamweka patōka, kodi abe ne ku bakwabo kwine. (Tala 1 Temote 4:15.) Sapulai nandi kyaba ne kyaba, tambilai mu busapudi bwa miswelo yonso, kubadila’mo ne bukamoni bwa kiponka na ponka, nakampata mu kipindi kyosaka kupebwa’mo bukwashi bwabinebine.
9 Mutadi wa mingilo ukata mutyima ku kwendelela kobe. Ukepangula kitatyi ne kitatyi mwendeji wa kyenu Kifundwa kya Kitabo muswelo omwena biyampe mu mpangiko. Mutadi wa kipindi nandi ukakukwasha mu bupempudi bwandi pa kyenu kipwilo.
10 Yehova usakanga bantu bandi bafundijibwe, bekale ‘bakumbanye byonso mwanda wa mwingilo onso muyampe.’ (2 Tem. 3:17) Tumonei ino mpangiko ya Bapania Bakwasha Bakwabo bu mulangwe mulumbuluke ukadilwe wa kukwasha boba bonso basakile kulumbulula bwino bwabo bwa mwa kusapwila kinenwa. Wivwane ubapebwa dyese dya kukwashibwa na ino mpangiko, nankyo londa’yo na mutyima wa kufwija’ko, wa kwityepeja, ne nsangaji ponka.