Twingidijei Mabuku a Kala Senene
1 Konso konso pi na pi pano pantanda, bantu i bongwije midiyo ne midiyo ya mabuku a kala mu bibīko. Ino lelo bantu bamwenanga kamweno’ka kanyeke mu ano mabuku? (Mus. 12:12) Mabuku akokela milangwe pa Bulopwe bwa Leza ne pa bintu byobukalongela bantu adi na mvubu mikatampe mpata. Bipwilo bivule bikyungwijije mu bibīko mabuku pala pala a uno muswelo alupwilwe kumeso kwa 1985. Mu uno Kweji 1 mo motukapāna ano mabuku a kala.
2 Adi na Mvubu Yabinebine: Kepabulwe padi tukokeja kulanga’mba ano mabuku ke mapwe kala mvubu shi twiadingakanye na mabuku a panopano, ino tuvulukei amba akifīle bubinebine bwa mu Bisonekwa. Musapu wa Bulopwe ushintulwilwe’mo ukidi monka na mvubu ne dyalelo dino, shi muntu wiulonda, ukapandija būmi bwandi. (Yoa. 17:3) Nanshi tufwaninwe kulonga bukomo bwabinebine twingidije senene ano mabuku a kala.
3 Tutalei mwanda umo ulombola mvubu ya ano mabuku. Lolo umo wapyene nkambo wandi mwana-mukaji mabuku a kala alupwilwe na Batumoni ba Yehova. Kamoni umo waipangula uno lolo shi uyukile amba ano mabuku adi na mvubu. Nandi kishima tentu amba: “Nkiyukilepo mvubu yao minemine, ino le nkeiyuka namani?” Uno lolo waitabija kifundwa kya Bible, watwela mu bubinebine, ebiya ye kumona wamona mvubu ya kibīko kya mabuku kyashile nkambo wandi. Bine, kino kibīko kya mabuku a kala kyaikele bu kipyanwa kya mvubu mikatampe mpata!
4 Pāna’o ku Bantu: Kitatyi kyopāna mabuku a kala mu busapudi bwa ku njibo ne njibo, yuka kupāna’o ne mu kujokelamo kupya ku bantu boyukile amba basangelanga kutanga mabuku etu, kubadila’mo ne boba balongeje abonema ya Kiteba kya Mulami ne Amkeni! ne boba badi mu dishinda dyobe dya mapepala. Ne bowifunda nabo Bible nabo monka na monka, mabuku kampanda a kala akokeja kwibapa buyuki bwa kyalwilo bukatandabula mwivwanino obevwana bubinebine. Nobe kokelwa kwileela dibuku dya kala dyo-dyonso dipatukile mu kibīko kyobe kya mabuku. Uno o muswelo okongwija kibīko kya mabuku a kiteokratike kya mvubu mpata, kyokengidija senene kitatyi kyowifunda pa kasuku.
5 Pa kyaba kya kuleka mabuku etu a kala adya muswa, twiengidijei senene mwanda wa kukunka mityima ya bantu bayuke ‘kwakamwa Leza wabine ne kulama bijila byandi.’—Mus. 12:13.