Malondololo Ku Bipangujo Byenu

◼ I bintu’ka bifwaninwe kutanwa mu kibīko kya mabuku kya Masomo a Mwingilo wa Kiteokratike?

Kibalwa kikatampe kya mabuku esambila pa Bible i kipebwe ku bantu ba Leza mwanda wa bamwene’mo pakatampe. Bidi basapudi bavule kebadipo nao onso, kibīko kya mabuku kya Masomo a Mwingilo wa Kiteokratike, kidi ku Njibo ya Bulopwe, kikebakwasha ku kulonga bukimbi mu mabuku obadi padi kebakokejapo kumona kuntu kukwabo. Kadi mu kino kibīko kya mabuku mufwaninwe kutūlwa: bwalamuni bwishileshile bwa Bible, mabuku alupwilwe panopano na Sosiete, tukuto twa Mwingilo Wetu wa Bulopwe ne mavolime reliye a Kiteba kya Mulami ne a Amkeni!, kutentekela’po ne maendexe a mabuku (les index des publications). Mufwaninwe kutūlwa ne dibuku dishintulula bishima diyampe dilupwilwe panopano. Maansikolopedi, bitabo bya tulata twa ntanda, bitabo bya kunyemena’ko bya ngalamele nansha bya mānga bikokeja kwikala na bukwashi. Inoko, kitungo kyetu kibajinji i kwikala na mabuku alupwilwe na ‘umpika wabinebine ne wamanwa.’​—⁠Mat. 24:⁠45.

Padi bitabo bidi na myanda ipatanwa bikokeja nabyo kutanwa mu kibīko kya mabuku kya Masomo a Mwingilo wa Kiteokratike. Kekifwaninwepo nansha dimo kutweja’mo bitabo bitelwa bu maroma, bitabo bya nshintulwilo ya Bible itamba ku bakonkotodi ba mu meso fututu, nansha bya mafilozofi ne bya majende. Kibīko kya mabuku kya Masomo a Mwingilo wa Kiteokratike kifwaninwe kwikala enka na bitabo bikwasha boba bāya kwibitanga bekankila kwendelela kumeso kumushipiditu.​—⁠1 Tem. 4:⁠15.

Mutadi wa masomo ye mwinē kiselwa kya kutala kino kibīko kya mabuku, nansha shi kudi mwanetu mukwabo utongelwe bu wa kumukwasha ku kino kiselwa. Ufwaninwe kuta mutyima ku kibīko kya mabuku kikale kwendela pamo na mabuku mapya alupuka, ko kunena amba, ufwaninwe kubweja’mo mabuku mapya tamba’nka poakifikafika. Dijina dya kipwilo kinē kibīko kya mabuku difwaninwe kusonekwa biyampe pa dyani dibajinji dya dibuku ne dibuku. Mwaka ne mwaka, mabuku onso a mu kibīko akabandaulwa, mwanda wa kutala shi kemudi amoamo asakilwa kulongololwa nansha kupingakanibwa.

Batwe bonso tufwaninwe kwingila kakasa kakasa mwanda wa kulama bukundwe bwa kibīko kya mabuku. Kifwaninwe kuta mutyima kitatyi kyotupūtula bitabo. Kekifwaninwepo kuleka bana bakaya nabyo, ne kekifwaninwepo kwandika’mo kintu nansha kimo. Bishima bipotoloke bikasonekwa pa kibīko kya mabuku mwanda wa kuvuluja amba bitabo kebifwaninwepo kutamba panja pa Njibo ya Bulopwe.

Kudi bipwilo bivule bipya byabundilwe panopano, byokidi uno muswelo, dimodimo bibīko bivule bya mabuku bikekala bipatuke. Basapudi bamobamo badi na mabuku akala bakokeja kulangila kipwilo ne kwikipa’o. Pakwabo bakulumpe bakatyiba mbila ya kulomba kulupwilwa dikwabo mavolime reliye a Kiteba kya Mulami. Nankyo kibīko kya mabuku kya Masomo a Mwingilo wa Kiteokratike kikekala na bukwashi, kikakwasha umo ne umo ku kusokola byabulēme bifyame bya Kinenwa kya Leza bipāna buyuki, tunangu ne ñeni.​—⁠Nk. 2:​4-6.