Mpangiko Mipya Itala Bibīko bya Mabuku bya ku Njibo ya Bulopwe
Pano ke myaka mivule, bipwilo bya pano pa ntanda ponso bimwena’nka kumwena mu kwingidija kibīko kya mabuku kya ku Njibo ya Bulopwe, kyādi kitwa dibajinji bu kibīko kya mabuku kya Masomo a Mwingilo wa Kiteokratike. Mu myaka ya kunyuma, kipwilo ne kipwilo kyadi kinenwe kwikala na kyakyo kibīko kya mabuku. Inoko, byokwaikala pano Mobo a Bulopwe mavule apwidila’mo bipwilo bibidi nansha bivule, bikwabo bya mu ndimi ya bweni, bibamweka amba i kipite buya bipwilo bipwidila mu Njibo ya Bulopwe imo abyo’ko binena ludimi lumo bikale na kibīko kimo kya mabuku kya ku Njibo ya Bulopwe, kikunkane senene, kibwejibwa’mo nyeke mabuku mapya. Mu Mobo a Bulopwe adi na byumba bibidi nansha bivule bya kupwidila’mo, kyumba ne kyumba kifwaninwe kwikala na kibīko kya mabuku mungya ludimi ne ludimi lwa bipwilo bipwidila’mo.
Tulanga amba ino mpangiko mipya ikashija kyaba mu njibo ne kutyepeja milupu ya lupeto. Ne kadi, kutyanga pamo bibīko bya mabuku bya bipwilo bibidi nansha bivule kekukabulwepo kuleta bibīko bya mabuku biyampe mpata. Shi mubatyanga pamo bino bibīko, oa mabuku ekala abidi abidi mukayata’po dimo dimo ne kulama’o mwa kwingidijija’o kitatyi kikwabo shi Mobo a Bulopwe mapya abaubakwa. Shi ku Njibo ya Bulopwe kudi kompyuta utwejibwa’mo dishike ditwa bu Watchtower Library, bamo bakamona amba kino kingidilwa kidi na kamweno mpata.
Ku kibīko ne kibīko kya mabuku kya ku Njibo ya Bulopwe, kukekala tutu umo ukengila bu mulami wakyo, nakampata i umo wa mu batadi ba Masomo a Mwingilo wa Kiteokratike. Ufwaninwe mu mafuku mu mafuku kubweja’mo mabuku mafwaninwe, ne kutūla dyangi shē munda mwa kibalu kya dibuku ne dibuku kayukeno kalombola amba i dya mu kibīko kya mabuku kya ku Njibo ya Bulopwe. Ufwaninwe kubandaula kibīko kya mabuku, nansha’tu musunsa umo ku mwaka, mwa kutadila shi mabuku onso i mabwane senene ne shi adi biyampe. Mabuku a mu bino bibīko keafwaninwepo kuselelwa panja pa Njibo ya Bulopwe.
Kibīko kya mabuku kya ku Njibo ya Bulopwe kitendelwanga mpata na bonso ba pa kipwilo. Tulombolei amba batwe bonso umo ne umo tukwete’kyo na mutyika na kwikikwatakanya ne kwingidija’kyo mwa kukimbila “buyuki bwinebwine bwa Leza.”—Nk. 2:5, NW.