Tupānei Bukamoni Buvule Pafwena Mfulo Pano

¹ Kitatyi kya mwangulo kikalanga kitatyi kya nsangaji. Kadi kyo kingilwanga mwingilo mukomokomo wa kungwija byangulwa. Ino nakyo kikalanga kityetye. O mwanda bengidi kebengilapo na mulēle nansha dimo.

² Mu muneneno wa kyelekejo, Yesu wādingakenye ‘kuvuika kwa ngikadilo ya bintu’ na kitatyi kya mwangulo. (Mat. 13:39) Pano tudi mu kitatyi kya kuvuika kwa ngikadilo ya bintu, kubetushadila kakitatyi katyetye ka kupāna’mo bukamoni “panopantanda ponso.” (Mat. 24:14) Mfulo byoyafwena bininge, tufwaninwe kwielela’ko mu mwingilo wetu. Mwanda waka? Mwanda Yesu wāshintulwile’mba: “Byakwangula umbudimi i bivule bīne, nanshi bakuputuminamo i batyetye.”​—⁠Mat. 9:​37, 38; Loma 12:⁠11.

³ Twikalei na Kampeja-Bukidi: Pāshilwile Yesu mwingilo wandi mukatampe wa busapudi, kwāmushadile’nka myaka isatu ne kipindi kete ya kuvuya mwingilo wāmupelwe. Wādi usapula na kampeja-bukidi, amba: “Mfwanyinwe kusapula Myanda Miyampe ya Bulopwe bwa Leza . . . , mwanda e kyo kyantumine Leza.”​—⁠Luka 4:​43, MB.

⁴ Yesu wākunine mu bandi bana-babwanga mushipiditu umo onka wa kampeja-bukidi. (Mako 13:​32-37) O mwanda bādi “monka mo bukila, mo bukila, mafuku onso, kuleka’byo kufundija mpika, ne kusapula bya Yesu mu njibo īkola ya Leza ne mu mōbo bitupu.” (Bil. 5:42) Kebādipo babanga bintu bya mvubu mityetye mu būmi bwabo. Nansha byobādi batyetye, ino bābwenye kusapula myanda miyampe “mu bipangibwa byonso bya muno munshi [mwa diulu].”​—⁠Kol. 1:⁠23.

⁵ Buluji bukatampe botufwaninwe kwikadila na uno mushipiditu wa kampeja-bukidi dyalelo, i kumona kotwamona’mba “mfulo ya bintu byonso īdi pa bwipi ponka.” (1 Pet. 4:⁠7) Yehova i mutunge difuku ne nsaa yakafudija ino ngikadilo ya bintu. (Mat. 24:36) Mwingilo wa busapudi ufwaninwe kuvuibwa mu kano kakitatyi ketushadila’ko. O mwanda tufwaninwe kwipāna bininge mu kusapula myanda miyampe ku bantu bangibangi bene.

⁶ Wivwane twikale kwitonwena’ko mu uno mwingilo wa kupāna bukamoni pafwena mfulo pano, i bine netu tukalombola Yehova na mutyima mufukate amba: ‘Tubapu mwingilo owētupele kwingila,’ pamo na mwāmulombwedile Yesu.​—⁠Yoano 17:⁠4.