“Sapula Uno Mwanda . . . ne Kupyasakana Monka”
1 Shi ubatambula kintu kampanda kilembwe’po amba i “KYA KUPYASAKANA NAKYO,” usaka kwikimona namani? Kintu “kya kupyasakana nakyo” i kintu “kya kuta’ko mutyima ponka na ponka.” Mutumibwa Polo wādi na bubinga pa kusoñanya bene Kidishitu amba “sapula[i] uno mwanda . . . ne kupyasakana monka.” (2 Tem. 4:2) Lelo nobe witabanga ku uno mwingilo na kuta’ko mutyima ponka na ponka?
2 Kekubulwe padi Polo wālombwelwe amba banababo bamo bādi na kisela kibi kya kwingila na ‘mulēle mingilo yabo’ ya bwine Kidishitu. (Loma 12:11) Uno mulēle wālādikile mingilo yabo, bājimija ne nsangaji mine yobādi ba kumwena mu kukwasha bakwabo.
3 Muswelo Wādi Umwene Yesu Uno Mwingilo: Nsangaji yādi na Yesu paādi wingila wandi mwingilo yādi ya kashaa! Wānene amba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” Kino kifwa kya Yesu kyātonwene bandi bana-babwanga baākankamikile amba ‘madimi abapu kutōkeja, ke kwangula.’ (Yoa. 4:34, 35) Mutyima wa kupyasakana wādi na Yesu mu mwingilo wandi onso, tamba ngalwilo ne mfulo, wāmwekele patōka paālombwele bandi bana-babwanga amba “lombelai bidi amba mwine byangulwa alundule bakuputumina mu byangulwa byandi.” (Mat. 9:38) Yesu wādi muyuke amba mwingilo wāmupelwe wādi wa kusapula, o mwanda wādi musumininwe kwingila pakubulwa kuleka kintu nansha kimo kimukalakanye.
4 Lelo Batwe Netu? Ano mafuku o mene otufwaninwe kwikala na bupyasakane bukatampe bwa kwendelela kumeso na mwingilo wa busapudi. Mu bifuko bivule bya ntanda, madimi ke matōkeje kala, ke kwangula’o. Nansha ke mu matanda mwadi mumweka bu mwasapulwasapulwa, pano mubatyijibwanga tununu twa bantu mwaka ne mwaka. Ayo mfulo ya ino ngikadilo ya bintu yenda ifwena, ‘bya kulonga mu mingilo ya Mfumwetu nabyo byenda bivudila’ko.’ (1 Kod. 15:58) Pano po pene’tu potufwaninwe kuputumina mu uno mwingilo wa kusapwila bantu musapu wa Bulopwe kutabuka myaka yo-yonso.
5 Tutakamanei mu kufikila bantu netu na ino myanda miyampe ku njibo ne njibo ne konso kutanwa bantu mu mwaba wetu. Tutambilei mu mwingilo kitatyi kyonso, uno o muswelo muyampe ulombola patōka amba twi batūle Bulopwe pa kifuko kibajinji mu būmi bwetu. (Mat. 6:33) Kusapula kotusapula nyeke uno mwanda na bupyasakane kuketuletela nsangaji mivule mpata.