Tufundijibwanga na Yehova
1 Mpangiko ya bufundiji iludikwa na Leza yendejibwanga pano mu matanda 233. I kutupu kintu kya mu ino ntanda kikokeja kudingakanibwa nayo. Yehova, Mufundiji wetu Mukatampe, witufundijanga mwanda wa kamweno ketu dyalelo, ne mwanda wa tukamone būmi bwanyeke.—Is. 30:20; 48:17.
2 Masomo a Bufundiji bwa Leza: Tala masomo afundanga bantu ba Yehova pa mwanda wa kamweno kabo. Masomo a Mwingilo wa Kiteokratike, endejibwa yenga ne yenga mu bipwilo 87 000, afundijanga midiyo ne midiyo ya basapudi ba Bulopwe mwa kwikadila’bo bu bengidi babinebine ba myanda miyampe. Lelo nobe wi mwilembeje’ko? Lelo nobe ubadilwa mu banabetu tununu ne tununu bafundile Masomo a Bapania mu mayenga abidi matuntulu? Kekubulwe padi kutyepejibwa kwatyepejibwa kibalwa kya nsaa ya bapania balonso kusa kupa bavule muswelo wa kwingila bu bapania ne kubwanya bisakibwa mwa kukafundila ano masomo. Masomo a Bufundiji bwa Mingilo, afundijibwa pano mu ndimi mikatampe kujokoloka ntanda yonso, nao akumbanyanga bakulumpe ne bengidi ba mingilo bankungulume mwa kuselela biselwa bikatampe mu mwingilo wa kiteokratike. Bitatyi bimobimo, bakulumpe ne bengidi ba mingilo bonso batambulanga bufundiji bwa pa bula ku Masomo a Mwingilo wa Bulopwe.
3 Mobo a ku Kitako kya Bufundiji a Sosiete Watchtower adi ku Patterson, mu New York, engidijibwanga mwanda wa kufundijija’mo masomo asatu matuntulu a pa bula, apāna bufundiji buvule mpata bwa kiteokratike. Kudi Masomo a Ngileade a Bwifundi bwa Bible a Sosiete Watchtower afundwa mu myeji itano, ateakanya bengidi ba kukengila bu bamishonele mu matanda a bweni. Banabetu ba mu makomite a misambo ya pano pantanda ponso nabo bafundijibwanga konka mu myeji ibidi myanda itala bulongolodi bwa misambo. Mu Kweji 5, 1999 masomo mapya a kufundija batadi bendakana ashilwile bidi na bana ba masomo 48 ba mu États-Unis ne mu Kanada. Bengidi ba Yehova bonso bamwenanga kamweno kalumbuluke mu bufundiji bwibafundija Yehova kupityila ku ano masomo meshileshile.
4 Tufundijibwanga Mwanda wa Bika? Tutu umo wa mu Kitango Kyendeji wanene amba: “Ino yetu mpangiko ya bufundiji yotwenda nayo i miletwe mwanda wa bantu ba Yehova ba konso konso, pi na pi, bafikile pa kutama kwabinebine kutelelwe mu Nkindi 1:1-4.” Tulomba Yehova ape umo ne umo wa motudi ludimi ‘lwa bantu bafundijibwe.’—Is. 50:4.