Tukwatei dijina dilumbuluke dya Yehova na bulēme bukatampe
1 Satana wāpunikile dijina dya Leza paākokele bambutwile betu babajinji mu bubi. Dyabola wāmwekeje Yehova bu mbepai wābepele Adama. (Ngal. 3:1-5) Buno bubela bwa Satana i lumvuba lukatampe byamwiko, mwanda dijina dya Leza dikwatañene na bukomo Bwandi bwa kufikidija kinenwa kyandi. Ino Yehova ukendanga tuto tonso tushiñwanga dijina dyandi kadi widilumbululanga na kufikija kwafikijija bityebitye mpango yandi ya buleza.—Is. 63:12-14.
2 Batwe twi bantu betwa na Yehova ‘pa dijina dyandi.’ (Bil. 15:14, 17) Kino kitupa mukenga wa kulombola muswelo otwidimwene bu dijila. Dijina dya Yehova i dilumbuluke kotudi, mwanda difunkilanga’nka pa bintu biyampe, bya kanye, bya buswe, bya lusa ne byoloke. Twakamwanga pa kuvuluka bukatampe bwa dijina dya Leza dya ntumbo. (Mit. 8:1; 99:3; 148:13) Lelo kino kitutonona tulonge bika?
3 Kuyukanya buujila bwa dijina dya Leza: Dijina dya Leza i dijila nakampata, kedifwaninwepo nansha dimo kusebulwa buujila bwadyo. Ino tufwaninwe kulombola amba tukwete dijina dya Leza na bulēme bukatampe na mwiendelejo muyampe ne na kusapula Bulopwe. Twelei tubobo amba: “Tendelai Yehova, itai pa dijina dyandi; sapulai bilongwa byandi umbukata mwa bantu’ba, telai’dyo amba dijina dyandi i dizunzulwe.” (Is. 12:4) Le tubwanya kwela tuno tubobo namani?
4 I na kukwatakanya mukenga o-onso wa kusapula dijina dya Yehova ne buluji bwadyo bonso. Busapudi bwetu, bwikale bwa kiponka na ponka, bwa ku njibo ne njibo, ku mangajini ne mangajini, mu bipito ne ku matelefone, bonso bupejanga Yehova bulēme. Shi tubatana bantu basepelela ne kuteja musapu, tufwaninwe kwipa nabo bilaeno bya mwa kujokela kwibafundija myanda mivule itala padi Yehova. Kino kitulomba kulēmeka bilaeno byetu pampikwa kushikilwashikilwa, ne kulonga buninge bwa kushilula nabo bifundwa bya Bible. Tudi na nsangaji potumona tutwa ne tutwa twa tununu twa bantu bafikila mwaka ne mwaka pa kuyuka dijina dilumbuluke dya Yehova, bedilēmeka ne kuyukanya buujila bwadyo.
5 Kutamba kotutambila na mutyima umo mu mwingilo wa kuyukanya buujila bwa dijina dya Leza ko kulombola patōkelela ku mutamba kotudi mu mwanda wālupwile Satana mu Edena. Uno o mwingilo mukatampe, mulēme kupita yonso yotwingilanga. Shi ke pano, tukwatei dijina dilumbuluke dya Yehova na bulēme bukatampe, twiditendelei na bupyasakane!—1 Bil. 29:13.