Kuyukanya Dijina dya Leza
1. Lelo kuyuka dijina dya Leza kufikijanga bavule ku kulonga bika?
1 Lelo walongele bika powaivwene dibajinji dijina dya Leza? Bavule balongele pamo na byanene mwana-mukaji umo amba: “Ponamwene dibajinji dijina dya Leza mu Bible, nadidile. Byantengele ku mutyima pa kuyuka amba pano najingulula ne kwanza kutela dijina dya Leza.” Mungya uno mwana-mukaji, kuyuka dijina dya Leza i ditabula dikatampe ditwala ku kuyuka Yehova amba i muntu kadi ubwanya kupwana nandi bulunda.
2. Mwanda waka i kya kampeja bukidi tufundije bakwetu myanda ya padi Yehova?
2 Mwanda Waka Tuyukanye’dyo? Dijina dya Leza i dikwatañane na ngikadilo, mpango ne bilongwa byandi. Ne kadi ditala ne pa lupandilo. Ke-pantu mutumibwa Polo wāsonekele amba: “Bonso bakwita pa dijina dya Yehova bakapandanga.” Ino wālanguluka amba le “bakamwita namani” shi kebayukilepo dibajinji Yehova ne kwikala na lwitabijo mudi aye? O mwanda i kya kampeja bukidi ku bene Kidishitu kuyukanya dijina dya Leza ku bakwabo ne byonso byodiselele. (Loma 10:13, 14) Inoko, kudi buluji butabukile buno bufwaninwe kwitutonona tuyukanye dijina dya Leza.
3. Lelo i buluji’ka bwinebwine botusapwila?
3 Mu myaka ya 1920, bantu ba Leza banañwine mu Bisonekwa mwanda utala diulu ne ntanda, wimanine pa kubingijibwa kwa bubikadi bwa Leza ne kutumbijibwa kwa dijina dyandi. Kumeso kwa Yehova konakanya babi, kutalulwa kwa mutonko utukwa dijina dyandi ne bubinebine butala padi, bifwaninwe “[b]iyukibwe panopanshi ponsololo.” (Is. 12:4, 5; Ezek. 38:23) O mwanda, buluji bwinebwine botusapwila i kutendela Yehova ku meso a bantu ne kuyukanya buujila bwa dijina dyandi ku muzo onso wa muntu. (Bah. 13:15) Buswe botuswele Leza ne muntu netu buketutonona twingile uno mwingilo witupele Leza ne pa mfulo.
4. Lelo Batumoni ba Yehova bayukibwanga namani pangala pa dijina dya Leza?
4 ‘Bantu ba Dijina Dyandi’: Mu mwaka wa 1931 twātongele dijina dya bu Batumoni ba Yehova. (Is. 43:10) Tamba penepa, bantu ba Leza bayukanyanga dijina dya Leza pi na pi, monka munenene dibuku Prédicateurs pa paje 124, amba: “Mu mizo yonsololo, yense utelatela dijina dya Yehova uyukibwanga bukidi bonka bu Kamoni wa Yehova.” Lelo nobe mo mobakuyukile? Shi tudi na mutyima wa kufwija Yehova pa buntu bwandi nabya ketukabulwepo ‘kwesela dijina dyandi,’ kwisambila padi aye ponso potumona mukenga.—Mit. 20:7; 145:1, 2, 7, NW.
5. Le mwiendelejo wetu utala namani dijina dya Leza dyotwityilwa’po?
5 Byotudi ‘bantu ba dijina dyandi,’ tufwaninwe kukwatakanya misoñanya yandi. (Bil. 15:14; 2 Tem. 2:19) Divule dine bantu bayukilanga Batumoni ba Yehova ku mwiendelejo wabo mulumbuluke. (1 Pet. 2:12) Nanshi ketufwaninwepo kutukija dijina dyandi na kupēlula misoñanya ya Leza nansha na kutūla butōtyi bwandi pa kifuko kya bubidi mu būmi bwetu. (Levi 22:31, 32; Mal. 1:6-8, 12-14) Ino mwikadilo wetu wa umbūmi ufwaninwe kulombola amba tuswele madyese otupelwe a kwityilwa pa dijina dya Leza.
6. I madyese’ka otudi nao dyalelo ne otukekala nao nyeke?
6 Dyalelo, tubemwena kufikidila kwa binenwa bya Yehova bya amba: “Kushilwila ku kutamba kwa dyuba, kutūla ne ku kupona kwadyo, dijina dyami i dikatampe umbukata mwa baJentaila.” (Mal. 1:11) Twendelelei nanshi kuyukanya bubinebine bwa padi Yehova ne ‘kwesela dijina dyandi dikola myaka yonso, nyeke ne nyeke.’—Mit. 145:21.