Le ukesamba bika na muntu unena’mba Leza kadi’kopo?
1 “Mondyukile ami, Leza kadi’kopo,” ye polofesele umo wa mu Polonye wadi ulombola mishonele umo mu Afrika. Inoko kaka wesamba na uno lolo polofesele, wamupa ne dibuku La vie : comment est-elle apparue ? Évolution ou création ? Mishonele pa kujokela’ko yenga mukwabo, polofesele wamusapwila’mba: “Pano kubapu, nayuka’mba Leza udi’ko!” Watangile dino dibuku Création dyonso dituntulu, ku mfulo walomba bamufundije Bible. Le ukalonga namani ubwanye kusapwila boba banena’mba kebetabijepo mudi Leza? Dibajinji, yuka bidi buluji bwibalengejanga banene uno muswelo.
2 Bintu bilengejanga bantu baleke kwitabija: Mu bantu banenanga’mba Leza kadi’kopo, ke bonsopo batamine na ino milangwe. Bavule bādi batōta ne kutōta mu mutōtelo kampanda, betabije mudi Leza. Ino bintu kampanda, shi misongo, shi bimyanda bya mu kisaka, shi bibi’ka shi bibi’ka byēbalongelwe byāzozeja lwitabijo lwabo. Bakwabo i myanda yobafundijibwanga ku masomo makande yo yalamunanga mumweno wabo obadi bamona Leza. Ivwana bifwa bya bantu bādi banena amba Leza i kutupu’ye, ino mwenda mafuku batamija lwitabijo lukomo mudi Yehova Leza, baikala Batumoni bandi.
3 Lolo umo mu Paris wabutwilwe na misongo ya kuladikwa mikupa. Wadi unena’mba Leza kadi’kopo, nansha byaadi mubatyijibwe mu Katolika. Difuku dimo waipangula bamasele mwanda waka Leza wamulekele ubutulwa na buno bulema; nabo amba: “Mwanda ukuswele.” Uno lolo wapela kwitabija uno mulangwe wambulwa kwendela’mo. Ivwana kifwa kikwabo kya nkasampe mwine Felande, bamupimine amba udi na luba lwa mu misunya lwa zenzeka; mulume nobe ushikete’nka mu kakinga. Inandi waenda nandi kwa mulombi wa mu kipwilo kya Pentekosa wadi unena’mba ubelulanga babela. Watunya kumundapa mu kingelengele. Ponka’po, uno nsongwalume wajimija kikulupiji kyandi mudi Leza, kanena’mba Leza kadi’kopo.
4 Mwana-mulume umo mwine Honduras nandi watamīne mu Katolika, ino wakafunda filozofi ya mishikatyilo ya bantu ne lufundijo lunena amba Leza kadi’kopo. Bufundiji bwa ku inivelesite bwamukulupija’mba bantu i batambe ku kwialamuna, walekelela ne kwitabija mudi Leza kwine. Kudi ne lolo umo mwine États-Unis watamīne mu kipwilo kya Metodishite. Wafunda masomo a kuyuka milongelo ya bantu, etwa mu bulungu bu psychologie. Lelo lukulupilo lwandi lwajinine namani? Unena’mba: “Mu bushipo bumo’tu, bauñonakenya kalwitabijo konso konadi nako mu myanda ya Leza.”
5 Kutenga mityima ya bantu ba mityima myoloke: Mu bantu banenanga’mba kebetabijepo mudi Leza, bavule basakanga kuyuka shi kudi muswelo wa kupwija bimyanda bya misongo, nkalañani ya mu bisaka, mboloji, ne bikwabo. Babilanga na mutyima umo kuyuka malondololo ku bipangujo bivulevule, kifwa: ‘I kika kikadile’ko bubi?’ ‘Mwanda waka bantu bayampe bafikilwanga na bintu bibi?’ ne ‘Lelo būmi budi na buluji’ka?’
6 Ba mulume ne mukaji ba mu Suise batamine abo bonso na milangwe ya kunena’mba Leza kadi’kopo. Pobebasapwidile myanda miyampe musunsa umbajinji, bapelele’yo. Ino badi na bimyanda bikomo mu kisaka, basaka’nka kwilubula. Batumoni pa kwibapempula monka, balombola bano ba mulume ne mukaji muswelo ulombwelwe mu Bible wa kupwija makambakano abo. Batulumuka pa kumona madingi mafike’po adi mu Bisonekwa, baitabija kwifunda Bible. Busongi bwabo bwaninga, baendelela kumushipiditu, ku mfulo babatyijibwa ne kubatyijibwa.
7 Byokokeja kwisamba nandi: Shi muntu wakulombola amba ketabijangapo amba Leza udi’ko, longa buninge uyuke buluji bwanenena namino. Lelo i mwanda wa masomo afundile’ni, i bimyanda byatenwe nabyo’ni, nansha i buzazangi bwa bipwilo ne mfundijo ya bubela byaamwene? Ukokeja kumwipangula’mba: “Lelo wadi ulanga uno muswelo tamba kala’ni?” nansha “Kudi kintu kampanda kyakufudije ku wao mulangwe?” Malondololo andi akakukwasha uyuke bya kunena. Papo byopalomba milangwe mikomo ya kumunekenya nayo, ta mutyima ku dibuku Y a-t-il un Créateur qui se soucie de vous ?, dibwanya kumukwasha.
8 Ukokeja kwendeleja nandi mīsambo na kumwipangula’mba:
◼ “Le kasha kweipangwile amba: ‘Shi Leza udi’ko, mwanda waka kudi masusu mavule ne mboloji mu ino ntanda?’ [Muleke akulondolole.] Ivwana nkulombole munenena Bible pa uno mwanda.” Tanga Yelemia 10:23. Shi ubapu kutanga, munene akulombole mwamwena kino kisonekwa. Kupwa mupūtwile mukanda Connaîtrons-nous un jour un monde sans guerre ? pa paje wa 16 ne wa 17. Ukokeja kwingidija nansha shapita wa 10 mu dibuku Créateur. Munene atambule dibuku, akatange myanda idi’mo.—Shi usakila’ko milangwe mikwabo, tala dibuku Kutoa Sababu, pa paje wa 222-224.
9 Kunena na bubine, ke bonsopo banena’mba Leza kadi’kopo baketabija bubinebine. Ino bavule basakanga ne kuyuka milangwe mishile na yabo. Nanshi ingidija milangwe miluji, nakampata ya mu Kinenwa kya Leza idi na bukomo bwa kwibanekenya, mwa kwibakwashisha nabo bayuke bubinebine.—Bil. 28:23, 24; Bah. 4:12.