Myanda Mimweke
◼ Ostrali: John, muntu mufunde wadi wenda ku kipwilo ukidi nkasampe, ino mwenda mafuku waikala ke muntu “utuna tunē kwikala’ko kwa Leza.” Pania umo wāmushidile boloshile unena’mba, La vie a-t-elle été créée ? Ebiya mu kwitana kukwabo wamushila boloshile L’origine de la vie. Uno pania waendelele kutamija kusangela kwandi na kumuletela mapepala a panopano ne kumulombola kishinte kyo-kyonso kisambila pa bupangi nansha pa bupolofeto bwa mu Bible. Kitatyi kyaamwene’mba John usa kwitabija, wamuletele kitabo La Bible : Parole de Dieu ou des hommes ? Pa kupwa kutanga’kyo, John washilula kwimona bu muntu “walakana bityetye kwikala’ko kwa Leza.” Kupwa pania wamutweja mu dibuku Bifundija Bible, walombola John musango 8 pa paje 20 ne musango 13-16 pa paje 23-24. Bisonekwa bitelelwe mu dibuku byatulumwine John, kokunena wanena’mba, “Mona bu mfwaninwe kutanga Bible monka.”
◼ Meksike: Mukelenge umo wasapwidile musapudi umo amba, kakulupilepo amba Bible i musonekejibwe na Leza. Musapudi wamupa bubinga bulombola’mba Bible i musonekejibwe na Leza. Pa kupwa kwa mīsambo mityetye, mutyima wa uno muntu washilula kutengwa na byaadi wifunda mu Bible. Watengelwe bininge kitatyi kyaayukile mwikadile misoñanya ya Leza. Walombola musapudi amba: “Kitatyi kyotwatangile nobe Bible pamo musunsa mubajinji, byadi bimweka’tu bu i madingi’nka na adi mu mabuku makwabo kadi keauntengelepo bininge. Ino pano potwatanga’ye, kutabukidila pa madingi atala mwikadilo, natengwa ku mutyima.”
◼ États-Unis: Ba mulume ne mukaji bamo baingile mu busapudi bwa pa bula bwa mu bibundi bikatampe, betene na mwana-mukaji umo wa mu Taiwane wadi ukulupile mudi Leza, ino wadi ulanga amba Bible i wa bantu ba Kushika. Wafwena ku kameza ka bitabo mwanda wadi wimona bu mujimine nansha byaadi na būmi bwa katūtu. Wadi ukulupile amba Bible wadi wa kumukwasha asokole kitungo mu būmi. Bano ba mulume ne mukaji bashilula kwifunda nandi mu dibuku Bifundija Bible pamo ne boloshile La paix et le bonheur durables : comment les trouver. Pa kyaba kya kwifunda shapita 2 mu dibuku, besambila pa kipindi kimo kya mu boloshile kinena’mba “Un guide bénéfique pour tous les humains.” Abo pa kupwa kwifunda misango isamba mibajinji mu kino kipindi, uno mwana-mukaji watulumuka amba, Bible i dibuku dya pa bula shi twididingakanye na mabuku makwabo a bipwilo. Pa kwifunda bupolofeto bwa mu Bible kebufikidile kala wanena’mba, “I kutupu dibuku dikwabo dya bine pamo bwa Bible!”
◼ Jampani: Nansha shi mwine njibo wasapwidile musapudi amba kakulupilepo mudi Leza, musapudi waendelele na kumujokela ne kwisambila pa bishinte bya mu Réveillez-vous ! binena’mba “ Hasard ou conception? ” Bityebitye, mwinē njibo washinta mumweno wandi ne kushilula kwitabija’mba Umpangi udi’ko. Panenwa pano kemukulupile amba Leza udi’ko, kadi musapudi kaefundenga nandi mu boloshile Myanda Miyampe Itamba Kudi Leza!
◼ Kanada: Kaka umo wapēne mapepala a panopano kudi mwana-mukaji umo watambile ku yandi njibo, kajokoloka ku wandi motoka. Kaka pa kumujokela dikwabo, uno mwana-mukaji wamusapwila na kusumininwa amba kasangedile’byopo kadi kakulupilepo mudi Leza. Ino kaka aye kapungilepo, wamuletela ne boloshile Une vie pleinement satisfaisante : Comment. Kitatyi kaka kyaakamutene ku njibo, wamulombola amba nansha byaayukile amba kakulupilepo mudi Leza, wadi ulangulukila bininge pangala pandi mwanda i mbutwile ulela bana kasuku. Walombola uno mwana-mukaji musango 6 udi pa paje 4 wa uno boloshile, wisambila pa kwine kwa kutana madingi mayampe. Kupwa wamukankamika atange bulombodi budi mu kifundwa 2 kisambila pa kulela bana kasuku. Uno mwana-mukaji wasangele bininge pa kutambula uno boloshile.