‘Bana-Bakaji Bengila Mpata Mudi Mfumwetu’
1 Na bino bishima bidi kūlu, Polo wādi utendela ba Taifena ne Taifosa, bakaka babidi bipanda mu mingilo bādi pa kipwilo kya Loma. Wātendela ne kaka Peshise amba i “wakwingila byamalwa mīngilo mudi Mfumwetu.” Wētemba ne Febe amba i “mukwashi wadi ukwasha bangi bangi.” (Loma 16:2, 12) Mu Bisonekwa, Dokasa i muyukanike bu “muyūlwe munda mwandi mīngilo miyampe, ne byabuntu kudi balanda.” (Bil. 9:36) Bine, bana-bakaji bapye kumushipiditu i madyese pa kipwilo!
2 Lelo tutendelanga bakaka bengila mpata mu kyetu kipwilo? I bine bengilanga mpata mu mwingilo wa busapudi, bendeja bifundwa bivule bya Bible, bakwasha ne bapya bavulevule. Kadi bapityijanga kitatyi kivule mu kukwasha bana amba bendelele kumushipiditu. Bano bana-bakaji bene Kidishitu bavuijanga’mo kipindi kyabo na kutamija mushipiditu wa buswe, wa nsangaji ne wa bupyasakane mu kipwilo. Mu miswelo mivule, bangulanga’ko balume ne ba mu kisaka kyabo amba bamone muswelo wa kulonga bivule mu mingilo ya Yehova.
3 Bakaka Badi mu Mingilo ya Kitatyi Kyonso: Mu bano bengila mpata mudi Mfumwetu tubadila’mo ne bakaka bamishonele, bavule balungululanga mwingilo mu matanda a bweni. Bakaka bakaji ba batadi bendakana nabo monka na monka, baputuminanga mu mwingilo wa busapudi mu bipwilo bipempulwa na babo balume, i bine bakankamikanga bakaka bavule. Eyo, ne bakaka ba ku Betele nabo ketudipo mwa kwibedilwa, bengilanga mingilo ikola ya kukwatakanya bulongolodi bwa Yehova. Kadi ne bakaka bapania balonso, pa mwanda wa bukomo bwabinebine bobalonga mwanda wa kutumbija Leza, bakwashanga bantu tununu ne tununu befunde bubinebine.
4 Bano bana-bakaji babinebine batananga kuloelelwa kukatampe mu kuno kwabo kwipānina mu mingilo kwaikala ke mwikadilo wabo. (1Tem. 6:6, 8) Tufwaninwe kwibafwija’ko, kwibakankamika ne kwibakwatakanya byabinebine.
5 Bakaka bene Kidishitu i tutyi tutūlwa ku lūbako mu bulongolodi bwa Yehova, bengilanga mingilo na mutyima umo, bine ino yabo mingilo i dyese ku bonso. Nanshi tufwijei’ko nyeke bano bakaka ne kulombela Yehova ekale nabo nyeke mu mingilo yabo yobendelela na ‘kwingila mpata mudi Mfumwetu.’