Tusapulanga Myanda Miyampe
1 Bine, i madyese makatampe mpata otupelwe pa kwikala basedi ba “myanda-miyampe ya bintu bilumbuluke!” (Loma 10:15) Tudi na musapu ufukatyija mityima wa kusapwila bantu bavudilwe tusua ne kubulwa lukulupilo. Tusaka kwibakwasha namani nabo bajingulule amba myanda yotwibaletela i “myanda-miyampe ya bintu bilumbuluke”?—Is. 52:7.
2 Teakanya’ko Musapu Muyampe: Mīsambo yetu mu mwingilo ikekala yūbaka shi twimanina pa bintu biyampe. Nanshi potuteakanya mwa kukasapwidila bantu musapu nansha potupituluka mu dibuku dya kukapāna, tulupwilei patōka milangwe miyampe ikwatañene na musapu. Wivwane twikale kupāna lukulupilo lwetu lwimanine pa Bible na kikulupiji ne na buzanzamuke, byotukamwena’mo biketukankamika.—Nk. 25:11.
3 Nansha byotukwatwanga na lusa petusapwilanga bantu mobamwena malwa mu ino ntanda ya tusua, tufwaninwe kwibalombola amba kintu kimo kete kikāya kupwa makambakano abo i Bulopwe bwa Leza. Nansha shi twisamba nabo myanda ya kwiya kwa ‘difuku dya kulubula kinongo’ dya Yehova, i biyampe kwibashintulwila amba binebine ino i ‘myanda miyampe ku boba batūkanye.’ (Is. 61:1, 2) Tukapa boba betwivwana kikulupiji amba bintu byo-byonso bilonga Yehova, panopano ponka bisa kwituletela ndoe mikatampe ne mwikadilo muyampe.
4 Pāna Bubinebine na Nsangaji Yabinebine: Bantu pobamona mpala yobe ya mimungomungo, ne diwi dyobe ditūke dinena bintu bikulupija, bakasangela kukuteleka. Shi bemvwaniki bamona muswelo otwibasapwila na kikulupiji, bakayuka amba ‘twi basepelele mu lukulupilo’ lotwibaletela. (Loma 12:12) Pa kumona namino, bakasolokwa mutyima wa kwitaba ku myanda miyampe. Kyabine, tudi na bubinga bwa kwikadila na mutyima wa kikulupiji, wa nsangaji mu miswelo yonso ya wetu mwingilo.
5 Byotudi bu bengidi ba myanda miyampe, bwetu busapudi kebwimaninepo enka pa kusapula kete. Bupanga bantu kikulupiji kyabinebine kya kwikala na būmi bulumbuluke pano ne mu myaka ikāya kumeso. (1 Tem. 4:8) Potulumba muntu ne muntu, kusepelela kudi mu mityima yetu kukeyukanya mu byotwisamba ne kadi kukakwasha bantu, nabo betabije myanda miyampe. Tutei mutyima ku byotwisamba ne muswelo mwine otwisamba’byo. Kulonga namino kukatonona boba ba mityima myoloke nabo bamone kukwatakanya myanda miyampe yotwibasapwila!