Twiulei Yehova, Wetu ‘Leza wa Nsangaji’
1 Yehova usakilanga bantu bekale na nsangaji. Kinenwa kyandi kilombola madyese a kutendelwa abikile muzo wa muntu. (Is. 65:21-25) O mwanda bakwetu bafwaninwe kumona amba tudi na nsangaji ya kusapula ‘myanda miyampe ya ntumbo ya Leza wa nsangaji.’ (1 Tem. 1:11) Muswelo otusapula musapu wa Bulopwe ufwaninwe kulombola amba tuswele bubinebine kadi tutele bantu botwisamba nabo mutyima bya binebine.—Loma 1:14-16.
2 Na bubine, kudi kyaba kimo kikomanga kwikala na ino nsangaji. Ke-pantu mu myaba imo, tutananga’mo bantu batyetye betabija senene kusapwilwa musapu wa Bulopwe. Pakwabo kudi mafuku netu otwikokanga na makambakano makomo a mu būmi. O mwanda pa kwikala na mutyima wa nsangaji, bitulomba kulangila bantu ba mu wetu mwaba amba basakilwa kuteja ne kwivwanija myanda miyampe ya Bulopwe yotusapula. (Loma 10:13, 14, 17) Kulangulukila pa kino kuketukwasha twendelele na nsangaji kuyukija mpangiko ya lusa ya Yehova ya kupandija bantu.
3 Wisambile pa Bintu Biyampe: Tufwaninwe kadi kuta mutyima ku byotunena. Pamo tukokeja kushilula mīsambo na kutela mwanda nansha musapu utele’ko bantu mutyima, ino tufwaninwe kwepuka kwisambila pa myanda yampikwa mvubu. Mwingilo wetu i wa kuleta “myanda miyampe ya dyese.” (Is. 52:7; Loma 10:15) Ino myanda miyampe i musapu wimanine pa milao ya Leza ya būmi buyampe bwitutengele kumeso. (2 Pet. 3:13) Pa kino, twingidijei Bisonekwa mwanda wa “kūndapa ba mityima mityumuke.” (Is. 61:1, 2) Shi tulonge namino nabya tukekala na mutyima wa nsangaji ne na mumweno muyampe wa bintu.
4 Na bubine bantu kebakabulwepo kumona nsangaji yetu kitatyi kyotusapula. Penepa nanshi twendelelei na kulombola ngikadilo ya Yehova, wetu “Leza wa nsangaji” kitatyi kyotusapula myanda miyampe ya Bulopwe ku bantu ba mu wetu mwaba.