‘Batompibwe mu Myanda Itala Kufwaninwa’—Muswelo’ka?
1 Kuno kutanta kwenda kutanta Bulongolodi bwa Yehova kulomba nyeke batutu babwenye bisakibwa ba kwingila bu bengidi ba mingilo. Batutu bavule kebapelwe bwingidi, kubadila’mo ne bansongwalume, babilanga kwingila mu kipwilo. Pobapebwanga kamwingilo kampanda, beivwananga bu bakwashi, ne bu tutyi tutūlwa ku lūbako. Kwendelela’bo kumeso i kwikala’bo ‘batompibwe mu myanda itala kufwaninwa.’ (1 Tem. 3:10) Bakatompibwa namani?
2 Kiselwa kya Bakulumpe: Bakulumpe, shi kebabandaula tutu kampanda mubwanye bisakibwa bikwatañene na Bisonekwa binenwe kufikila’po boba basaka kwingila bu bengidi ba mingilo, bitanwa mu 1 Temote 3:8-13, kipindi kikwabo i kino, bakamutompa ne kufwaninwa kwandi mu myanda itala kusela biselwa. Babwanya kumupa kwingila mingilo kampanda ya bukwashi, kifwa kwabanya mapepala nansha mabuku, kupāna mikro, kukundulula Njibo ya Bulopwe, ne bikwabo. Bakulumpe bakatala mwaketabila ku mingilo imupelwe ne mwakengidila’yo. Bakamutadila ku bino: ngikadilo ikulupilwa, kulēmeka kitatyi, kininga, butūkanye, mushipiditu wa kwingila pakubulwa nsengwa, ne bwino bwa kwikala biya na bantu. (Fid. 2:20) Lelo i kifwa kiyampe mu muvwadilo ne mu mwidyangwilo wandi? Le i mwana-mulume uyukile kwiselela biselwa aye mwine? Kikimbwa i “alombole ku mwikadilo wandi mulumbuluke mīngilo yandi ya pa kikōkeji kya ñeni.” (Yak. 3:13) Lelo wikankilanga’ko binebine kufikila pa ditabula dya bu mukwashi mu kipwilo? Le ulondanga lubila lwa Yesu lwa ‘kulonga bantu nabo ke bana-babwanga’ na kupyasakena mu mwingilo wa busapudi?—Mat. 28:19; tala Kiteba kya Mulami kya 1 Kweji 9, 1990, paje 18-28, mu Falanse.
3 Nansha byokekudipo kipimo kya myaka kitungilwe kya kwanjila’po bu mwingidi wa mingilo, inoko Bible utela bano batutu bu ‘bana-balume bengila.’ Ke bibudyepo bya bana nansha bankasampe bininge, mhm, mwanda bebatela bu bantu babwanya kwikala na mukaji ne bana. (1 Tem. 3:12, 13) Ke bobapo baselwa na “kilokoloko kya bunkasampe,” ino i boba beendeja bya bulēme, badi na mwimanino musumininwe ne mutyima wa mundamunda utōka ku meso a Leza ne a bantu.—2 Tem. 2:22.
4 Shi mwanetu udi na kyabuntu kya kibutwila i biyampe, inoko kikatampe kisakwa i mwikadilo ne mushipiditu wandi. Lelo mwanetu uno ukimbanga na mutyima wa binebine kwingidila Leza ne kwikala mukwashi wa banababo? Shi ye mwaikadile, i bine Yehova ukamwesela mu bukomo bwandi bwalonga bwa kwendelela kumeso mu kipwilo.