Myuya ya Bantu Idi mu Kyaka!

¹ Bible unena patōka amba Yehova usakila “bantu bonso kupanda.” Inoko kunena na bubine, kumona būmi bwa kumeso bwa bano bantu midiyala ne midiyala badi pano pa ntanda kulonda mungya muswelo obetaba kudi Yehova Leza ne ku Bulopwe bwandi bwabikele kupityila kudi Yesu Kidishitu. Kwitaba kusakwa kwimanine enka pa kwitabija ‘buyuki bwabinebine bwa bubinebine’ kete. (1 Tem. 2:​3, 4) Ponso potwenda tupāna musapu amba pano pa ntanda pakakombwa bubi bonso mwanda wa kushila kyaba ntanda impya ya Leza ya boloke, tufwaninwe kuyuka kadi amba uno mwingilo otupelwe kwingila i wa kupandija bantu.​—⁠Mat. 24:14; 28:​19, 20; Loma 10:​13-15.

² Kisakilwa Kupelakana na Busapudi I Kika? Yesu wētudyumwine “kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo” kwa ntanda. (Mat. 24:21) Kino kyamalwa kikafikanga pa kunana kwakyo pa Amakedona. (Kus. 16:16) Mu bibumbo bya bantu bikatukijibwa pa mwanda wa kubulwa kwitaba ku myanda miyampe mudi ne betu babutule, balondakani netu, bakwetu botufundanga nabo ku masomo, ne botwiyukile nabo bonso bakubulwa kwitabija. Inoko batwe kyotusaka i kufikila “bantu bonso” mwanda tulondanga kifwa kya Leza, ulombwele buswe bwandi ku ino ntanda yonso ya bantu pa kupāna Mwana wandi, Yesu Kidishitu, bu kinkūlwa kya kwibakūla bonso. (Yoa. 3:16) Tufwaninwe kwielela’ko kwita bonso bāye banyemene mu kifuko kya mutyima-ntenke kya Leza. Shi twingila mwingilo wa busapudi ne pa mfulo, tubwanya kwepuka kwitwika mashi a bantu.​—⁠Ezek. 33:​1-7; 1 Kod. 9:⁠16.

³ Kitungo Kyetu I Kitungo’ka? Mvubu ya uno mwingilo wa kusapula i milombolwe mu Kinenwa kya Leza. Mutumibwa Polo wānene amba ‘buswe bwa Kidishitu bo bwituningilanga’ tukwatañanye būmi bwetu na mashinda a Leza. (2 Kod. 5:14) Kadi ne Kiteba kya Mulami nakyo kinenenanga nyeke pa kiselwa kyetu kya kusapula. Mwingilo Wetu wa Bulopwe nao wendelela na kuleta buludiki bwa mwa kusapwila biyampe. Bakulumpe bateakanya mwingilo ne kwitukankamika tutambile’mo. Basapudi netu nabo betwita tutambile nabo mu mwingilo. Twimvwananga bintu bivule bitukankamika kuteakanya misapwilo yetu, kupāna mapepala ne mabuku makwabo, kulonga kujokela’mo kupya, kwendeja bifundwa bya Bible, ne kukwatakanya mukenga o-onso umweka mwanda wa kupāna bukamoni. Byonso bino bitukwashanga tufikile pa kitungo kyetu kya kupandija myuya.​—⁠1 Kod. 9:​22, 23; Ef. 1:⁠13.