Twendelelei na Kusapula!
1 Kiswa-mutyima kya Leza i “bantu bonso [bekale] kupanda, bafike ne pa kuyūkidija kwa binebine.” (1 Tem. 2:4) Buno bo bubinga bwine bwaetupelele mwingilo wa kusapula myanda miyampe. (Mat. 24:14) Shi tuyuke bubinga bwine botufwaninwe kwendelela na kusapula, nankyo i kutupu kintu nansha kimo kiketutyumuna mu bidyoma nansha kwituponeneja mu kilabi.
2 Mwanda Waka Tufwaninwe Kūminina? Mu ino ntanda mudi bintu bivule bipuakanya bantu mpata, bibalengeja belwe nansha kupēleka byotwibasapwila. Nanshi tufwaninwe kwendelela na kwibavuluja musapu wa Leza uleta lupandilo. (Mat. 24:38, 39) Pakwabo kadi ngikadilo ya bantu yalamukanga kyaba kyonso mu būmi bwabo. Nansha ke ngikadilo ya ntanda nayo ibwanya kwalamuka na mu kukopa kwa diso. (1 Kod. 7:31) Padi kesha dīya’ko, nansha yenga ne kweji wiya’ko’u, bantu botusapwilanga babwanya kutanwa na myanda mikwabo ibwanya kwibapa mutyima wa kukwata na mutyika mukatampe myanda miyampe yotwibaletela. Mwene nobe ufwijanga’ko mpata pangala pa kūminina kwadi kūminina Kamoni wadi wīya kukusapwila bubinebine?
3 Twiulei Lusa lwa Leza: Yehova utūkije mutyima palekele’ko kitatyi kampanda kipite’po kumeso kwa kutukija babi. Kupityila kotudi, wendelelanga na kukoka bantu ba mityima myoloke bavundamukile kwadi amba nabo bakapande. (2 Pet. 3:9) Wivwane tuleke kusapwila bantu uno musapu wa Leza wa lusa ne kwibadyumuna ku butyibi bwa Leza busa kuponena pa boba bonso bapelele kuvundamina ku mashinda abo mabi, nankyo tukalambikwa mashi. (Ezek. 33:1-11) Nansha shi bantu kebasangelapo nyeke busapudi bwetu biyampe, ketufwaninwepo kuleka kulonga bukomo bwetu bonso bwa kusaka kukwasha boba ba mityima myoloke nabo bayuke mubaile lusa lwa Leza.—Bil. 20:26, 27; Loma 12:11.
4 Tulombolei Buswe Bwetu: Yehova Leza ye uletele ino mbila ya kusapula myanda miyampe ntanda yonso, wiiletele kupityila kudi Yesu Kidishitu. (Mat. 28:19, 20) Nansha shi bantu bapela kwituteja, batwe tudi na mukenga wa kulombola buswe bwetu ne kwipāna kotwipēne kudi Leza potwendelela nyeke na kulonga byoloke.—1 Yoa. 5:3.
5 Bine, twikalei basumininwe kwendelela na kusapula! Tusapulei nyeke na bubyasakane pano potukidi mu “difuku dya kupanda” dya Yehova.—2 Kod. 6:2.