Mwanda waka Twendelela na Kusapula?

¹ Lelo mwingilo wa busapudi bwa Bulopwe washilwile kwingilwa mu kyenu kibundi tamba kala? (Mat. 24:14) Shi i amo, ukokeja kulanga amba kyenu kipwilo ke kisambakanye kala mwaba wakyo onso. Padi bantu bavule bomwitananga nabo mu busapudi bamweka bu bañumauma ku musapu wa Bulopwe. Nansha nankyo, tala myanda inenwe pangala pa bana-babwanga babine ba Yesu mu dibuku Prophétie d’Isaïe II, pa paje 141, amba: “Mu bifuko bimo, bipa byobamona mu busapudi bikokeja kumweka amba i bityetye shi twibidingakanye na buvule bwa mingilo ne bukomo bobalonga. Inoko abo bomininanga’nka kūminina.” Penepo mwanda waka bendelela na kusapula?

² Tuvulukei Yelemia: Kūminina kotūminine nyeke mu mwingilo wa busapudi kekufwaninwepo kwimanina pa mwitabilo wa bantu amba shi abaimvwana twaendelela, ino shi kebemvwenepo twaleka’byo. Yelemia wāsapwile mu bula bwa myaka 40 mu mwaba umo onka nansha byomwādi bantu batyetye’tu bādi bamwivwana, ino bavule bapela musapu wandi. Mwanda waka Yelemia wādi utakamene namino? Mwanda wādi wingila mwingilo wāmusoñenye Leza, kadi kuyuka kwaādi uyukile bintu byādi bīya kumeso kwādi kumupa mutyima wa kunena pampikwa moyo.​—Yel. 1:17; 20:9.

³ Ne batwe netu dyalelo mo monka. Yesu i mwitusoñanye amba “kafundijei bantu, mwibasapwididile’mba: Uno’u ye enka mutungulwe kwa Leza, ke Mutyibi wa bōmi ne baf[we] bēne.” (Bil. 10:42) Musapu otuselele ukokeja kuleta būmi nansha lufu ku boba bemvwana’o. Mwanda bantu bakatyibilwa mambo kukwatañana na mwitabilo wabo ku myanda miyampe. Byobidi namino, kiselwa kyetu i kulonga byonso byobetusoñenye kulonga kubapu. Nansha shi bantu abapele kwivwana, busapudi bwetu bwitupanga mukenga wa kulombola buswe bwa mushike botwibaswele ne kwipāna kotwipēne kudi Yehova na kwendelela kulonga byonso byotufwaninwe kulonga. Ino kudi bikwabo bivule.

⁴ Tumwenanga’mo Biyampe: Kulonga kiswa-mutyima kya Leza, nansha shi bantu ba mu mwaba betabija nansha bapela, kwituletelanga ndoe ya mu mutyima, kuloelelwa, ne nsangaji keitanwapo mu dishinda dikwabo nansha dimo. (Mit. 40:8) Būmi bwetu bwikalanga na buluji ne kitungo kyabinebine. Ponso potutambila bininge mu busapudi, mityima ne ñeni yetu ibambilanga enka pa lukulupilo ne pa nsangaji ya kukekala mu ntanda impya ya Leza. Kulanguluka pa ino milao ya mu Bisonekwa kulumbululanga būmi bwetu bwa ku mushipiditu ne kuningisha kipwano kyotupwene na Yehova.

⁵ Nansha shi tubasapula pampikwa kumona bipa ponka na ponka, tuyukei amba nkunwa ya bubinebine ikokeja kushala mu mityima ya bantu ne kumena ikamena mu kitatyi kitungile Yehova mwine. (Yoa. 6:44; 1 Kod. 3:6) Kunena na bubine batwe bonso ketuyukilepo i bantu banga bakāya kwifunda myanda ya Bulopwe pangala pa buninge bulonga bantu ba Yehova mu kibundi kyetu ne kujokoloka ntanda yonso.

⁶ Pano po pene potufwaninwe kulonda musoñanya wa Yesu unena’mba: “Dyumukaipo mwikale [nyeke balanguke], ne kulombela ponka, mwanda bānwe kemuyūkilepo ne kitatyi ko kidi. Kadi kyokya kyo nena nenu, nekinena ne ku bonso’mba: Tengelai bidi.” (Mako 13:​33, 37) Shi ke pano, batwe bonso twendelelei na kusapula myanda miyampe ya Bulopwe, ne kutōkeja Yehova pa mutyima ponso potuyukanya na bayukanya buujila bwa dijina dyandi dikatampe ne dikola.