Kine Kyotujokela’mo Enka Kujokela
1. I kipangujo’ka kipangulwa pangala pa mwingilo wetu wa busapudi?
1 Mu bifuko bivule, tusapulanga mu mwaba wetu divule dine. Tujokelanga’mo enka kujokela ku mobo amo onka, nansha pakwabo shi bene mobo betunena’mba kebibasangejepo. Penepa mwanda waka twendelela kwisamba na bantu bapelele kwitwivwana?
2. I bubinga’ka bubajinji bwitutonona tutakamane na mwingilo?
2 Buswe Botuswele Yehova ne Bantu: Bubinga bubajinji bwitutonona tutakamane na mwingilo wetu i buswe botuswele Yehova. Mityima yetu itutonona tulombole bakwetu myanda itala Leza wetu Mukatampe. (Luka 6:45) Kuswa Yehova ko kwitutonona tukōkele mbila yandi ne tukwashe bakwetu nabo bakōkele’yo. (Nk. 27:11; 1 Yoa. 5:3) Kūminina nyeke mu uno mwingilo kekwimaninepo pa kwitabija nansha kupela kwa bantu. Enka ne Bene Kidishitu ba mu myaka katwa kabajinji bāpangilwepangilwe, ino abo kasha bendelela na kusapula ‘kuleka’byo mpika.’ (Bil. 5:42) Shi bantu abapele kwivwana, batwe ketukazozapo pa kino, ino tukemanija ne kulombola buswe ne lulamato lukatampe kudi Yehova.
3. Kuswa bantu kuketukwasha namani twendelele kusapula?
3 Tutakamene kadi mwanda tuswele mukwetu. (Luka 10:27) Yehova kasakilepo nansha umo oneke. (2 Pet. 3:9) Enka ne mu mwaba motwingila kesha kesha, mukidi bantu basaka kwingidila Yehova. Kimfwa mu Guadelupe, muntu umo pa 56 wa pa kino kisanga i Kamoni wa Yehova, ino mwaka wadi’mo bantu 214 babatyijibwe. Kintu kya bantu 20000 batenwe ku Kivulukilo, ko kunena’mba muntu umo pa bantu 22 ba mu Guadelupe!
4. Myaba ibwanya kushinta mu miswelo’ka imo?
4 Kushinta kwa Mwaba: Kudi bivule bibwanya kushinta kitatyi ne kitatyi mu mwaba wetu. Mu kupita kubajinji padi bapelele kwitaba, ino pano muntu mukwabo wa mu kisaka—padi yewa kaivwene musapu wetu—ye washitula kibelo ne kwituteja. Pakwabo tukokeja kutana bantu bakwabo basangela musapu. Bana ba bambutwile bapela kusapwila bakokeja kutama ne kukashikata kungi. Bano babwanya padi kwitabija kwivwana musapu wa Bulopwe.
5. I bika bilengejanga bantu bamo bekale kwivwana?
5 Bantu nabo bashintanga. Mutumibwa Polo wādi bidi ‘utuka Leza, ne kupangapanga, ne bingojila.’ (1 Tem. 1:13) Ne bavule bengidila Leza dyalelo nabo monka na monka, pa kala badi bapela kwivwana bubinebine. Bakwabo mafuku amo, badi bashikilwe myanda miyampe. Ngikadilo ya ntanda shi ibashinta, boba balwana netu nansha boba ba mityima ya bujundu bakokeja kwituteja. Bangi nabo bekalanga na mutyima wa kuteleka pa kupwa kuponenwa na kinkumbulu, kimfwa kufwilwa muntu obasenswe, kujimija kaji, kubulwa lupeto, nansha misongo.
6. Mwanda waka tufwaninwe kwendelela kusapula na kyanga?
6 Ngikadilo ya bintu keidi ku kyoyampepo, ino mwingilo wetu wa kusapula ne kufundija ao wenda’nka kumeso. (Is. 60:22) Pa kino, twendelelei kusapula na kyanga ne kumona nyeke bintu mu muswelo muyampe. Kepabulwe muntu mukwabo osa kwisamba nandi usa kukuteja. Bine, tunena’nka kunena! ‘Mu uno muswelo, tusa kwipandija batwe bene, ne ba kwitwivwana bene kumo.’—1 Tem. 4:16.