Mwanda Waka Twendelela?
1 Padi kodi kala mwiipangule kino kipangujo, kimfwa kitatyi kyowiteakanya kutambila mu busapudi dyuba dyonso. Mu bifuko bimo, mwaba wikalanga upempulwa kitatyi ne kitatyi, ne kadi padi bantu ke betuyuke ne betwepukanga lubilo lonka. Bamobamo kete bo batambulanga biyampe musapu wetu. Ino kudi buluji buvule bulumbuluke bwitutonona twendelele.
2 Dibajinji, twi basoñanibwe kwendelela na kusapula musapu wa Bulopwe kufika’nka ne pakafika mfulo. (Mat. 24:14; 28:19, 20) Mupolofeto Isaya wāipangwile Leza bula bwa kitatyi kyaādi ufwaninwe kwendelela na mwingilo wa busapudi. Kilondololwa kiletelwe mu Isaya 6:11, kidi patōka. Yehova wāmunene endelele na kupāna musapu wa Leza ku bantu. Kidi muswelo umo onka ne dyalelo. Yehova usaka netu twikale kwendelela na kupempula bantu ba mu mwaba wetu, nansha byokimweka’mba betwepukanga. (Ezek. 3:10, 11) Kino kyo kiselwa kijila kyotupelwe.—1 Kod. 9:17.
3 Dyabubidi, kwendelela na kusapula i mukenga wa kulombola mushike wa lulamato lwetu kudi Yehova. (1 Yoa. 5:3) Kadi, kitatyi kyotulanguluka ku bintu byafwena bitengele muzo wa muntu, lelo i muswelo’ka otukokeja kwikaka ku kudyumuna na buswe bantu botwikele nabo? (2 Tem. 4:2; Yak. 2:8) Shi tuvuije na kikōkeji mwingilo wetu wibatala abo, nabya tukavudija dyese kobadi dya kwitabija musapu wa lupandilo wa Leza, kadi kebakabulwepo kunena’mba twadyumwinwe.—Ezek. 5:13.
4 Pakwabo kadi, i ani uyukile? mutyima wa bamobamo ukokeja kwalamuka. Padi i pamwanda wa kushinta kwa ngikadilo, pamwanda kampanda walupuka mu kisaka, nansha pamwanda wa ngikadilo ya ntanda ikokeja kwibalanguluja bininge pa būmi bwa kumeso. Nansha kadi, tukokeja kwibalombola kintu kimo kikokeja kwibatenga ku mutyima mu muswelo muyampe, potwibasapwila difuku dimo ku yabo njibo. (Mus. 9:11; 1 Kod. 7:31) Kumfulo kadi kudi kuviluka. Tubwanya kutana bantu baile panopano kushikata mu mwaba wetu, ne bakokeja kutambula senene myanda miyampe, nansha babitumbafumu bashilula kushikata ku mobo abo ne beipangula kitungo kya būmi bwabo.
5 Lelo tukendelela? I amo! Bisonekwa bitupa buluji bulumbuluke bwa kukajokela bantu. Kumfulo, pakafula mwingilo wa busapudi, Yehova uketwesela mwanda wa bukomo bwampikwa kwizozeja botulonga mu mwingilo, kadi ukesela boba bonso baketabija myanda miyampe ya Bulopwe, mwanda wa kulombola kufwijako kwabo.—1 Tem. 4:16.