“Ketudi Basapule mu Wetu Mwaba Misunsa Mivule!”
1 Lelo kasha kwalangile amba kemudi basapule bininge mu wenu mwaba bimweka amba kemukishelepo muntu nansha umo udingakene na mukōko? Padi nobe unenanga’mba: ‘Ndyukile kala muswelo uketaba bantu ku musapu. Le kyoñendelela na kujokela ku bantu kebasangelapo musapu i kika?’ I bine, myaba mingi ke misapulwe’mo divule. Ino tufwaninwe kwikala na milangwe miyampe, kupita’ko kutyumuna mutyima. Mwanda waka tubanena namino? Tala buno buluji buná buletelwe kunshi’ku.
2 Milombelo Yetu Ke Milondololwe: Yesu wānene amba: “Budimi bwa kwangula i bukata, nanshi bakwangula bo batyetye, ino nanshi mwikale kwisashilapo mwine wakwangwilwa atalule bakwangula bāye kwangula budimi bwandi.” (Luka 10:2) Mu bula bwa makumi a myaka twadi tulomba nyeke Yehova etukwashe mpata. Mu bifuko bivule, tudi na bengidi bavule, pano ketusambakanyanga myaba misunsa ne misunsa na busapudi. Mwene tufwaninwe kusangala pa kuyuka’mba Yehova i mulondolole milombelo yetu?
3 Kūminina Kulupulanga Bipa Bilumbuluke: Nansha ke mu myaba isapulwanga’mo nyeke, bantu betabanga ku musapu wa Bulopwe, bekala ne na buyuki bwa bubinebine. Nanshi tufwaninwe kupempula bantu nyeke ne nyeke koku tukulupile amba tukatanina’ko bantu ba mityima miyampe. (Is. 6:8-11) Longa mwādi mulongela bana-babwanga babajinji ba Yesu, ‘enda nyeke’ usapwila bantu badi mu mwaba obakupele, koku wikankila’ko kulangula mityima yabo ya kusepelela Bulopwe bwa Leza.—Mat. 10:6, 7.
4 Mu Portigale bipwilo bivule bisambakanyanga myaba yabyo yenga ne yenga, inoko banabetu bakitananga’mo bantu badingakene na mikōko. Kaka umo wadi na mutyima wa lukulupilo mpata wanene amba: “Kumeso kwa kutambila mu mwingilo lubanga ne lubanga, nombanga Yehova ankwashe ntane’ko muntu usangela kwifunda Bible.” Difuku dimo wakwete mpangiko ya kwifunda na bantu bengila mu kibandilo kya nywene. Mwenda mafuku, lolo umo kete waitabija kifundwa. Yao lolo wamulombola’mba: “Bakwetu kebasangedile’byopo ino ami ndi mwibisangele.” Mu mweji umo nandi washilula kwendeja bifundwa byandi bibidi. Kepejije ne kwija kwine wabatyijibwa ne kushilula kwingila mwingilo wa bu pania!
5 Mwingilo Pano Wingilwanga: Pano myanda miyampe isapulwanga pamo’nka na mwēkilaile Yesu. (Mat. 24:14) Nansha ke mu bifuko mudi bantu ‘kebaswele kwituteja,’ bantu batūlwanga kiyukeno kupityila ku mwingilo wa busapudi. Tuyukile’tu amba bamo bakapumpunya, bakwabo nabo bakalwa na bubinebine. Ino bantu ba uno muswelo bafwaninwe nabo kudyumunwa byabinebine ku butyibi bwa Yehova bwiya kumeso’ku.—Ezek. 2:4, 5; 3:7, 8, 19.
6 Ketwapwile: Ke batwepo ba kutyiba kya mfulo amba kyaba kampanda kyo kya kwimika busapudi. Yehova mwine ye uyukile kitatyi kyobukafula. Uyukile shi mu wetu mwaba mukidi nansha kemukidipo bantu bakokeja kwitaba ku myanda miyampe. Dyalelo bantu bamo bakokeja kunena amba kebasangedilepo musapu, ino shi mwanda mukatampe ubebatana—kifwa kujimija kaji, misongo ya mpanda-mfwa, kufwilwa muswe—uno mwanda ubwanya kwibapa mutyima wa kusangela musapu kyaba kikwabo. Bantu bavule kebaikele bine kwivwana myanda yotusapula mwanda wa kufwatakanya kobetufwatakenya bibi ne mwanda wa kubulwa kyaba kya kwituteja. Ino shi twibapempula kitatyi ne kitatyi bya bulunda babwanya kuta mutyima kotudi ne kwituteja.
7 Bantu ba ino myaka badi na byabo bisaka bakwatanga būmi na mutyika mukatampe ne kwiipangula bipangujo bidi na malondololo enka mu Kinenwa kya Leza kete. Inabana umo nsongwakaji waityile Batumoni babidi, kanena’mba: “Ponakidi mwanuke, nkyadipo ngivwanija buluji bwadi bupangila mama Batumoni ne kwibalombola amba nkisangedile’byopo, ino abo badi basaka kwisamba nandi myanda ya mu Bible. Nadi nenena mu mutyima amba shi nakatama, nasongwe kendi pami, nketa Batumoni ba Yehova bāye banshintulwile myanda idi mu Bible.” Mo mwalongele uno lolo paile kumupempula Batumoni.
8 Lelo Ubwanya Kulundila’ko Bwino? Pavule ke’nkapo bantu botukapempulanga bakomejanga mwingilo otwingila kitatyi ne kitatyi mu wetu mwaba. Divule i ne batwe bene. Lelo twikalanga kala na milangwe mibi? Yuka amba kino kibwanya kwalamuna mulangilo wetu nansha ke mulupukilo wa diwi dyetu ne mwikadilo wa mpala yetu mwine. Ikala na mushipiditu muyampe, wa nsangaji. Tompa bidi ntwelelo mipya. Alamuna musapwilo obe, kadi longa buninge wiulumbulule. Padi kikulomba kwalamuna kipangujo kyobe kyoshilulanga nakyo nansha kukimba’ko kisonekwa kingi kya kutweja mu mīsambo yenu. Ipangula batutu ne bakaka bakwabo bakulombole misapwilo milumbuluke yobengidijanga mu mwaba. Tambila mu mwingilo na basapudi ne bapania beshileshile, jingulula i bika bilengeja mwingilo wabo upe bipa.
9 Mwingilo wa kusapula Bulopwe i mwitabijibwe na Yehova, wiwesela ne kwiwesela, kadi kutamba kotutambila’mo kulombola amba tumuswele kadi tuswele ne mukwetu. (Mat. 22:37-39) Nanshi twingilei uno wetu mwingilo enka ne pa mfulo, bine twingilei mu wetu mwaba kitatyi ne kitatyi pampikwa kukōka.