Le Usaka Kumwena mu Kwikala na Mwaba Obe?
1. Mwaba obe, le ko kunena namani?
1 Mwaba obe, le ko kunena namani? Kipwilo ne kipwilo byokidi na mwaba wakyo, nanshi uno’u i mwaba obe bunka, padi udi kubwipi na koshikete. Dibuku Balongololwe, dinena pa paje 103, amba: “Kwikala na mwaba wa kubwipi biyampe kukakupa muswelo wa kupityija kitatyi kivule mpata mu mingilo ya budimi. Kadi ukokeja kwita musapudi mukwabo engile nobe mu mwaba obe.”
2. Le ubwanya kwingidija namani mwaba obe mwanda wa kukwatakanya busapudi bwa mu kisumpi?
2 Ukwasha ku Busapudi bwa mu Kisumpi: Shi udi na mwaba obe kubwipi na koingidila, ukekala na muswelo wa kusapula ne mu kitatyi kya kukōkolokwa nansha kumeso kwa kujokela kwinjibo, padi na musapudi mukwabo wingila pabwipi na kodi. Shi mwaba obe i wa kubwipi na ku koshikete, ukokeja kusapula’mo ne ku kyolwa pamo na kisaka kyobe ponso pamweka mukenga. Eyo, shi kutenwepo ku kupwila kwa kwenda mu busapudi, i biyampe kulomba Yehova akuludike kumeso kwa kushilula busapudi. (Fid. 4:6) Ino ufwaninwe kwikala na bujalale pa kitatyi kyosapula mu mwaba obe ne kitatyi kya kukwatakanya mpangiko ya busapudi bwa kisumpi pa kipwilo. Nakampata mu Dya Mposo ne Dya Yenga, i biyampe kwingila pamo na kisumpi kyenu, mwanda o mafuku atambilanga bavule mu busapudi.
3. Le i kamweno’ka kadi mu kwikala na mwaba obe?
3 Kamweno: Shi udi na mwaba obe, kikakupēlela kusapula kitatyi kyo-kyonso kyomona kyaba. Byoudi pabwipi, kitatyi kya kusapula kikekala kivule, ino kya kwenda’mo kityetye. Uno mukenga ukakupa muswelo wa kwingila bu pania mukwashi nansha bu wa lonso. Besambi nobe basangela musapu byobadi pabwipi nobe, kikekala kipēla kulonga kujokela’mo ne kwendeja bifundwa bya Bible. Bavule bamwene amba kusapula mu mwaba wabo kwebakweshe beyuke biyampe na besambi nabo ne kutamija kikulupiji kyabo, kumeso kwa kujokeja mwaba’wa amba bakwabo nabo beulombe, nakampata shi i mwaba usapulwanga’mo misunsa mivule. Le kwingidila mu mwaba obe kubulwe’po kukukwasha pamo na kyobe kisaka muvuije ne pa mfulo bwingidi bwenu?—2 Tem. 4:5.