Le Udi Nobe na Mwaba Obe?
1. Mwaba wa muntu ne muntu i bika?
1 Mwaba wa muntu ne muntu i kipindi kya kusapwila’mo kyapelwe. Mwaba ufwaninwe kwikala kubwipi mwa kufikila’mo bukidibukidi ne kusapula’mo bunka nansha na musapudi mukwabo. Shako, i biyampe kukwatakanya mpangiko ya pa kipwilo ya busapudi bwa kyungwija, inoko kwikala na mwaba obe nako i kupite buya mwanda ukengila’mo ne pa mfulo byaba bikwabo, nakampata shi kipwilo kyenu kidi na mwaba mukatampe.—Bil. 10:42.
2. I byabuyabuya’ka bimwenwa mu kwikala na mwaba obe?
2 Byabuyabuya: Bamo bamonanga amba kusapula mu mwaba wabo wa kubwipi na kobengidilanga, mu kitatyi kya kukōkolokwa kwa midi nansha pa kupwa’tu kwa kaji, kudi na byabuyabuya bivule. Bakwabo nabo basangelanga kusapula pamo na kisaka kyabo mu wabo mukenza nansha mu nsaa umo kumeso nansha pa kupwa kwa Kifundwa kya Kitabo. Pa kino, kujokela’mo ne bifundwa bya Bible bisokolwa ke bya pabwipi, kadi bityepejanga’ko bukomo, kitatyi, ne lupeto. Shi udi na mwaba obe ukokeja kulonga bivule mu kitatyi kityetye, kadi ubwanya kwingila bu pania mukwashi kyaba ne kyaba, nansha kulomba bu pania wa lonso. Pakwabo kadi, kwingila mu mwaba wetu ne kwiyuka na bene mobo bikakwasha bekale betukulupile ne tukamona mwa kukwatañenya musapwilo wetu na bisakibwa byabo, ne kadi mwingilo wetu ukalupula bipa.
3. I mwanda’ka wemwenine pania umo waitabije kwikala na mwaba wandi?
3 Kaka pania umo wakankamikilwe na mutadi wa kipindi kwikala na mwaba wandi usekununa amba: “Naitabije ano madingi ne lubilo lonka neyuka na bene mobo ne kusamba nabo bulunda. Nasendulwile nsaa yami ya kwibapempula mungya bisakibwa byabo. Ku mfulo, kujokela’mo kupya kwami kwavula, tamba pa 35 kwafika pa 80 ku kweji, kadi naikala na bifundwa bya Bible bisamba-bibidi.”
4. I muswelo’ka okokeja kwikala na mwaba obe kasuku ne ukengila’mo namani?
4 Mwa Kwikadila Nao: Shi usaka kulomba mwaba obe, nabya wisambe na mwingidi utala myaba. Kokekaka kwita musapudi mukwabo amba musapule’mo nandi, kadi lemba biyampe majina a bantu bokutanapo ku mobo abo. Longa buninge bwa kusambakanya mwaba obe mu myeji iná. Shi ubakolelwa, nabya nena mutadi wa Kifundwa kya Kitabo nansha banabetu bakwabo bakukwashe’ko. Ku mfulo kwa myeji iná, ukokeja kwaluja mwaba obe owapwa, nansha kulomba kwingila’mo dikwabo. Inoko, ke biyampepo kwendelela na kulama enka mwaba umo’wa nyeke na nyeke, ino i biyampe kujokeja’o amba bakwabo nabo balombe’o. Shi udi mu kipwilo kidi na mwaba mutyetye ne i bikomo kupebwa mwaba obe wa kasuku, nabya ukokeja padi kulomba kipeta kityetye kya mwaba kudi mutadi wenu wa kifundwa kya kitabo.
5. I kika kisakibwa pa kusaka tuvuije mwingilo wa kusapula otupelwe?
5 Mwingilo otupelwe wa kusapula “panopantanda ponso” i mwingilo usangaja’po mpata. (Mat. 24:14) Inoko, ulomba kuyuka mwa kwingidijija bukomo mu muswelo muyampe. Busapudi bwa kyungwija kubweja’po ne busapudi bwa mu mwaba wa muntu ne muntu bubwanya kwitukwasha tufikile bavule bene na myanda miyampe.