Shi Bantu Kebadipo ku Mobo
1. I kikoleja’ka kyotutananga pa kwenda mu mwingilo wa ku njibo ne njibo?
1 Mu mikenza mivule, kutana bantu ku mobo pano kekwendanga kukoma. Mu ino “myaka ya malwa,” bavule bengilanga kaji ka nshikije-dyuba mwa kumwena twa kwikwasha nato. (2 Tem. 3:1) Bamo bakokeja kwenda kungi mwanda wa kusupakanya lupeto, nansha kwenda’tu kukepwija mukose. I muswelo’ka otukokeja kufikila bano bantu na myanda miyampe?
2. Le tukalongolola bintu byonso namani mwanda wa boba kebadipo ku mobo bakapempulwe?
2 Lemba Myanda Senene: Ditabula dibajinji i kulemba myanda itala boba boketutanapo ku mobo. Kulemba’yo kudi na mvubu nakampata shi wingilanga mu mwaba obe kyaba ne kyaba. Le ulembanga dijina dya kipito, nimelo ya kalata ka mwaba, dijina dyobe, ne difuku dya kweji? Ubwanya ne kushiya kyaba kya kulemba’po myanda mikwabo pokāya abe mwine nansha musapudi mukwabo kukatala boba kebadipo ku mobo abo. Shi kyaba kya kusapula’mo kyobadi bakupele kibapu, vuluka kupa yewa wapebwa mwaba’wa myanda yowadi ulembele, poso shi enka wakunena kwingila abe mwine ku mobo kekwadipo bantu. Lemba pa papye ungi bantu bonso basepelela musapu bowatana mwa kwibapempwila dikwabo.
3. Le i madingi’ka amo a mwa kwitanina na boba kebadipo ku mobo abo?
3 Tompa Kitatyi Kikwabo: Padi bantu bamo kebadipo ku mobo abo mu mafuku a twaji bakokeja kujokela kwabo mu byolwa nansha ku mfulo kwa yenga. Ubulwe’po kulongolola mpangiko yobe mwa kujokela’ko pa kitatyi kifwaninwe? (1 Kod. 10:24) Shi bitupu, ubwanya kulombola musapudi kampanda mobo keadi’kopo bantu amba ajokele’ko kitatyi kikwabo. Pakwabo, ukokeja kutuma mikanda ku boba kebadipo ku mobo nansha kwibeta ku telefone. Basapudi ba misongo ibakankaja kutambila mu mwingilo wa ku njibo ne njibo bakokeja kusangela kukukwasha mu uno mwingilo.
4. I kimfwa’ka kilombola mvubu ya kupempula boba boketutanapo ku mobo?
4 Kudi kimfwa kimo kitulombola mvubu ya kutompa kwitana na boba kebadipo ku mobo abo. Basapudi bamo badi bapempula divule njibo imo mu bula bwa myaka isatu mituntulu, ino ku mfulo batana mwinē njibo. Nanshi lolo mwinē njibo wadi nandi utengele mu kitatyi kyonso’kya kwitana na Kamoni mwa kushilwila dipya kifundwa kya Bible kyaashilwile kumeso kwa kuvilukila mu mwine mukenza’wa.
5. Le i kyaba’ka kyotukokeja kunena’mba mwaba ubavuika?
5 Vuya Mwaba Obe: Le i kyaba’ka kyotukokeja kunena’mba mwaba ubavuika? Divule, i shi kubalongwa bukomo bonso bwa kwitana na muntu ku njibo ne njibo. Padi i biyampe kushiya pantu pafyame matrakte nansha mapepala a kala ku mobo kekudipo bantu, nakampata mu myaba isapulwanga’mo divulevule. Mwaba ufwaninwe kuvuibwa mu myeji iná. Kupwa mwaba’wa ufwaninwe kubandaulwa mwanda wa mwingidi utala myaba alembe myanda mipya itala mwaba’wa.
6. Mwanda waka tufwaninwe kutompa kufikila muntu ne muntu wa mu mwaba wetu na myanda miyampe?
6 Kyotusaka i bantu bavule bene bamone mukenga wa kuyuka kwita pa dijina dya Yehova ne kupanda bakapande. (Loma 10:13, 14) Mu bano bantu mubadilwa ne boba kebatanwangapo ku mobo abo kitatyi kyotusapula ku njibo ne njibo. Pamo bwa mutumibwa Polo, ikala na mutyima wa “kusapula myanda-miyampe ya buntu bwa Leza.”—Bil. 20:24.