Langula Kusepelela Musapu kwa Bantu na Myanda Mipya
1 Lelo usaka kwikala nyeke na milangwe miyampe ya kukukwasha nabya mwingilo obe wikale usangaja ne kukoka bantu nabo basepelele musapu wa Bible? Nankyo ingidija bintu bilongeka mu ino ntanda ne mu kibundi moshikete pa kushilula mīsambo. Ubwanya kukokela milangwe pa myanda ipita mu kibundi, mu yenu ntanda, nansha ipita pano pa ntanda ponso. Bino bintu byalamukanga nyeke. (1 Kod. 7:31) Londa bino bifwa bidi kunshi’bi.
2 Makambakano a kubulwa kwa lupeto ne kukoma kwakoma būmi yo myanda ikalakala nayo bantu bininge. Nanshi ubwanya kunena’mba:
◼ “Lelo nobe kodi mwivwane binena bantu amba bei [ya kintu kampanda: tela’kyo] iyakanda monka?” Nansha kadi ubwanya kwisambila pa bulofwa shi kudi sosiete mikatampe yaikele kutalula bengidi bavule pa kaji. Mungya muswelo osaka abe mwine kushilula mwisambo, ubwanya kwipangwila’ko amba “Le kasha kweipangwile kine kyakomena būmi namino?” nansha amba “Molangila, mafuku onso bikekala bikomo kumona bintu bya umbūmi enka namino?”
3 Malapolo a bya bukalabale, kifwa binkumbulu bipita mu bisaka nansha mu bana ba masomo, abwanya kukupa pa kwanjila mīsambo mikwabo. Ubwanya kwipangula’mba:
◼ “Lelo watangile mu majulunale amba [tela kinkumbulu kyalongekele mu kibundi]?” Penepa mwipangwile’ko amba “Molangila i kika kilengeje kwikale bukalabale bupite uno muswelo mu ino ntanda?” nansha amba “Ulanga kukekalanga kitatyi kyotukashikata nyeke ku matwi talala?”
4 Myanda ya dilobe dya kyonakanya, bintenshi, nansha bimbidikita bya malwi elwa bantu ba ntanda imo mu bifuko bishileshile bya pano pa ntanda ponso i myanda ibwanya kukoka bantu. Kifwa, ubwanya kwipangula’mba:
◼ “Lelo Leza ye ulengeje kino [tela kimpengele]?” Pakwabo ubwanya kutela kimbidikita kampanda kyefudile kumweka, ebiya wanena’mba: “Shi bantu bonso basakanga ndoe, mwanda waka kumvwañana i kwibakomene?”
5 Ta mutyima ku myanda mipya ilongeka yobwanya kushilula nayo mīsambo. Madingi makwabo mayampe ubwanya kwiatana mu kabuku Kushilula ne Kwendeleja Misambo munshi mwa kamutwe ka mwanda “Myanda Ipita mu Kibundi,” pa paje 9-10. Inoko kokolwa kulamata ku mutamba kampanda mu bimyanda bya kipolotike nansha mu bimyanda bya kibundi. Ino kokela milangwe ku Bisonekwa ne ku Bulopwe bwa Leza, mwanda ye abo kete bukapwa lonso makambakano a bantu.