Kusapula mu Ino Ntanda Ishintashinta
1 Bine, bintu bishintanga bukidi bonka! Bufuku bumo’tu, shi kimpengele kya ntanda, shi lakilishi (kupona kwa lupeto), shi kuponejibwa kwa bwendeji bwa kipolitike, shi kinzengele kisapulwa konso konso, bikokeja kwikala ke mitwe ya myanda īsambilwa’po. Ino lubilo lonka bantu bakokeja kuta mutyima ku bintu bikwabo. (Bil. 17:21; 1 Kod. 7:31) Le i muswelo’ka otukakokela mityima ya bantu ku musapu wa Bulopwe otukimba kwibasapwila mu ino ntanda ishintanshita?
2 Jingulula Bitele’ko Bantu Mutyima: Muswelo umo wa kukoka mityima ya bantu i owa wa kwisambila pa binkumenkume bilongeka. Kyaba kimo Yesu wākokele milangwe ya bemvwaniki bandi na kutela kinzengele kyālongekele ne kyobādi bayukile amba bamone kubandaula mwimanino wabo ku meso a Leza. (Luka 13:1-5) Ne batwe netu mo monka, potusapula myanda miyampe, tufwaninwe kukwatañanya’yo na myanda ilongeka nansha myanda ya petu, amba imone kutenga mityima ya bantu ba mu wetu mwaba. Inoko, shi twisambila pa myanda ya uno muswelo, i biyampe tudyumuke kwikupa ku mutamba umo nansha mukwabo wa kipolitike nansha wa bya ntanda.—Yoano 17:16.
3 Le tukayuka namani bintu bilongeka bitele’ko bantu mutyima? Muswelo muyampe padi i kwipangula’tu kipangujo ne kuteja malondololo. (Mat. 12:34) Shi tutele bantu mutyima nabya tukayuka milangwe yabo, kadi na manwa tukajingulwila’ko bikwabo. Kamwanda kakumuna’ko mwinē njibo kabwanya kusokola i bika bitele’ko bavule ba mu mwaba mutyima kadi kakokeja kwitupa mukenga wa kupāna bukamoni.
4 Teakanya Mwisambo: Kitatyi kyotwiteakanya kwenda mu mwingilo wa budimi mu ino ntanda ishintashinta, tukokeja kwingidija kabuku Kushilula ne Kwendeleja Misambo. Madingi akwasha a mwa kutwejeja binkumenkume bilongeka mu mwisambo wetu atanwa pa paje 4 ne 7, pa kamutwe ka mwanda “Bupolapola/Kubulwa Kavutakanya” ne “Myanda Ipita mu Kibundi.” Ubwanya kutana myanda mikwabo mu Mwingilo Wetu wa Bulopwe wa Kweji 9, 2000, pa paje 8. Kitatyi kyoteakanya mwisambo obe, ta mutyima wa kutweja’mo kisonekwa kifwaninwe.
5 Shi tujingulula bintu bishintashinta bitele’ko bantu mutyima mu wetu mwaba, nabya tukakwatañanya’byo na mwisambo wetu wa myanda miyampe. Namino, tukamona kwisamba na bantu bintu bibatenga ku mutyima. Bine, tukakwasha bavule bayuke Yewa kayukilepo kushinta ngikadilo ne misoñanya yandi.—Yak. 1:17.