“Lelo Tufwaninwe Kuviluka?”
1 Bengidi bavule bepāne ba Yehova betabanga ku luno lubila lwa Yesu lwa ‘kwenda kukalonga bantu ba mizo yonso ke bana-babwanga’ bavilukanga benda kukengidila kokwa kukimbilwa basapudi bavule. (Mat. 28:19) Beula Polo wāitabile ku luno lwito lunena’mba: “Abukila kuno ku Masedonya witukwashepo!” (Bil. 16:9) Lelo i muswelo’ka muyampe ufwaninwe kuviluka?
2 Tabula Ditabula Dimodimo: Lelo kudi mu bifuko musapulwanga na dimodimo mu mwaba wa kyenu kipwilo? Shi bidi’ko, nankyo ufwaninwe kwipānina’mo bininge. Kumeso kwa kwenda kuntu kampanda, wisambe bidi na bakulumpe benu, batale shi wi mubwanye byonso mwa kuvilukila. Ufwaninwe kwipangula ne wenu mutadi wa kipindi shi uyukile kipwilo kidi pabwipi mobwanya kutandabwila mwingilo obe. Ku mutamba mukwabo, shi ubapu kupikula biyampe, ubamone amba bintu byonso i bibwane, ubwanya kubandaula mulangwe wa kwenda kukakwasha ku kibundi kingi nansha ku ntanda ingi. Shi ye mosakila, mubwanya abe pamo ne kyenu kitango kya bakulumpe kutumina musambo mukanda wa kwiuyukija kokwa kosaka kukengidila, mweuyukija ne būmi bobe bwa kiteokratike. I kipite buya kwenda bidi kwine kosaka kuvilukila’kwa, wamona ne mokwikadile, penepa koyuka kutyiba mbila ya kuviluka nansha kuleka kuviluka.
3 Dyumukai bya Kuviluka Buvilukeviluke: Banabetu bavule bavilukanga benda mu matanda angi, bakakimba pa mfuko, pakwabo bapengakana kususulwa. Mu kuno kwabo kwielaela, bamo baponenanga mu makasa a bandalandala bebalaya kwibakwasha ne kwibafikija mu ntanda ya bweni, ino bebadila’nka lupeto lobadi nalo, ku mfulo bebanyema. Kyaba kimo, bano bandalandala bekalanga baningila baviluki kuponena mu milongelo ya bya bukobakane. Abo pa kupela, bebakusa bunka bwabo mu ntanda mobavilukila. Enka namino, būmi bwa baviluki bwabipa kupita ne bwa mu ntanda yabo mwine. Papo kebasake banabetu bebape njibo mwa kulāla nansha bebakwashe, batwika bisaka bikwabo bya banabetu bene Kidishitu kiselwa, abyo bine nabyo bilwa kala na abyo makambakano ne byabyo bikoleja. Ba mu bisaka bimobimo basalañana, aba koku aba koku, papo bisaka byazoza ku mushipiditu mwanda wa mavilu a kudingilwa madingi mabi.—1 Tem. 6:8-11.
4 Shi usaka kuviluka mwanda wa kukakimba byobe byosaka, yuka kino, konso koenda, shi kwepi shi kwepi, kukabulwepo kutana’ko makambakano. I kipēla mpata kunekenya makambakano a uno muswelo kokwa koyukile kala ludimi ne bibidiji byako, kupita’ko kushilula būmi dipya ntanda-bene.