Bubine Butala Padi Leza ne Kidishitu

Lelo Leza I Ani?

Le Dijina dya Leza I Ani? Leza mwine unena’mba: “Ami ne Yehova. Dyo dyami dijina.” (Isaya 42:8) Dijina dya Leza dya bunka ditanwa kintu kya misunsa 7 000 mu Bible. Inoko, malamuni mavule a Bible i mapingakanye byampikwa kwendela’mo dino dijina na kitenta, pamo bwa “Mfumwetu.” Leza usaka wikale mulunda nandi, o mwanda ukukankamika wite “dijina dyandi.”​—Ñimbo ya Mitōto 105:1.

Bitenta bya Yehova. Bible wityilanga Yehova pa bitenta pamo bwa “Leza,” “Mwinē Bukomo Bonso,” “Mupangi,” “Tata,” “Mfumwetu,” ne “Mwinē Lupusa Lonso.” Mu milombelo mivule ilembelwe mu Bible i batele’mo Yehova pa bitenta byandi ne pa dijina dyandi dya bunka, Yehova.​—Danyele 9:4.

Mwikadile Leza. Leza i mushipiditu wampikwa kumweka. (Yoano 4:24) Bible ubingijanga’mba, “i kutupu muntu ke mumone Leza.” (Yoano 1:18) Bible ulombolanga mwine mwawiivwanina. Bantu babwanya kumusanshija nansha ‘kumusangaja.’​—Nkindi 11:20; Ñimbo ya Mitōto 78:40, 41.

Ngikadila ya Leza ya Kutendelwa. Leza kadipo na mboloji ku bantu ba mizo yonso ne miswelo yonso. (Bilongwa 10:34, 35) Kadi i “wa lusa ne kanye, wija pa kukwatwa bulobo kadi muyule buswe bwa ndamatyidile ne bubine.” (Divilu 34:6, 7) Inoko, Leza udi na ngikadila iná mikatampe.

Bukomo. Byadi “Leza Mwinē Bukomo Bonso,” udi na bukomo bukatampe bwa kufikidija milao yonso yalaa.​—Ngalwilo 17:1.

Tunangu. Tunangu twa Leza i tupite tunangu twa muntu ye-yense. O mwanda Bible unena’mba i “wa tunangu bunka bwandi.”​—Bene Loma 16:27.

Boloke. Leza uloñanga nyeke byoloke. Bilongwa byandi i “bibwaninine,” kadi i “wampikwa bukondame nansha patyetye.”​—Kupituluka mu Bijila 32:4.

Buswe. Bible unena’mba “Leza i buswe.” (1 Yoano 4:8) Leza kalombolangapo’nka buswe, ino aye mwine i buswe. Uloñanga bintu byonso na buswe bwandi bukatampe, kadi tumwenanga’mo mu miswelo mivule.

Kipwano kya Leza na Bantu. Leza i Tata wetu wa buswe udi mūlu. (Mateo 6:9) Shi tumukulupile, tubwanya kwikala balunda nandi. (Ñimbo ya Mitōto 25:14) Na bubine, Leza ukwita ufwene kwadi mu milombelo kadi wele ‘kuzumbazumba kobe konso kwadi, mwanda aye ukutele mutyima.’​—1 Petelo 5:7; Yakoba 4:8.

Le ba Leza ne Yesu I Beshile Paka?

Yesu Ke Lezapo. Yesu i mwishile na bantu bonso​—aye ye muntu umo kete wāpangilwe na Leza bunka bwandi. O mwanda Bible umutela bu Mwanā Leza. (Yoano 1:14) Pa kupwa kupanga Yesu, Yehova wāingidije wandi mwana umbedi bu “mwingidi mukatampe” pa kupanga bintu byonso ne bantu bakwabo bonso.​—Nkindi 8:30, 31; Bene Kolose 1:15, 16.

Yesu Kidishitu kētelelepo bu Leza. Inoko, wānenene amba: “ne mwimaniji utambile [kudi Leza], kadi Aye ye wantumine.” (Yoano 7:29) Yesu paādi wisamba na wandi mwanā bwanga umo, wānenene amba Yehova i “Tata kadi ye Shenu,” i “Leza wami kadi ye Leza wenu.” (Yoano 20:17) Yesu pa kufwa, Yehova wāmusangwila momwa mūlu, wāmupa ne lupusa lukatampe ku kuboko kwandi kwa lundyo.​—Mateo 28:18; Bilongwa 2:32, 33.

Yesu Kidishitu Ubwanya Kukukwasha Ufwene Kudi Leza

Yesu wāile pano pa ntanda mwanda wa kwitufundija myanda ya Shandi. Yehova mwine wānenene pangala pa Yesu amba: “Uno’u i wami Mwana, muswedibwe. Mwivwanei.” (Mako 9:7) Yesu uyukile Leza senene kupita muntu ye-yense. Wānenene amba: “I kutupu uyukile mwikadile Tata poso’nka Mwana ne yewa ense obasaka kusokwela’ye kudi Mwana.”​—Luka 10:22.

Yesu wāmwekeje ngikadila ya Leza mu muswelo mubwaninine. Yesu wāiwile senene ngikadila ya Shandi, o mwanda wānenene amba: “Yewa ense umona ami wamone ne Tata mwine.” (Yoano 14:9) Yesu wākokēle bantu kudi Leza na kumwekeja buswe bwa Shandi mu binenwa ne bilongwa byandi. Wānenene amba: “Ami ne dishinda ne bubine ne būmi. I kutupu wiya kudi Tata poso upityila padi ami.” (Yoano 14:6) Kadi wānenene monka’mba: “Batōtyi ba bine bakatōta Tata na mushipiditu ne bubine, mwanda bine, Tata ukimbanga badi namino bamutōte.” (Yoano 4:23) Langa’po bidi! Yehova ukimba bantu basaka kuyuka bubine bumutala pamo bwa abe.