‘Kinenwa Kinenwa pa Kitatyi Kifwaninwe’
1 Lelo kusambulwila bakwenu musapu uleta būmi kukukolejanga? Le ulañanga amba ufwaninwe’nka kwisamba bintu bya mushike nabya ye kubwanya ubwanye kutenga bemvwaniki ku mityima? Yesu paātumine bandi bana-babwanga, wēbalombwele amba: “Kadi byo muya’byo, mwenda musapula’mba, bulopwe bwa mūlu bubafwena pa bwipi.” (Mat. 10:7) Musapu ōbapelwe kewādipo mukomo, ino wādi upēla kusapula. Ne dyalelo nadyo mo monka.
2 Divule, kushilula mīsambo kulombanga kunena’tu binenwa bityetye kete kwapwa. Fidipa paātene Ntungu mwine Efiopya, wāmwipangwile amba: “Le uyūkile biyampe mwendele kyōtanga’kyo?” (Bil. 8:30) Bine, ku kino ‘kinenwa kyaānene pa kitatyi kifwaninwe’ kwālupukile mīsambo yāletele mpalo mikatampe!—Nk. 25:11.
3 Nobe ubwanya kufwena muntu na binenwa bya uno muswelo. Namani? Na kwikala mubandaudi ne na kutonga bishima bikwatañene na ngikadilo yotana. Ipangula kipangujo, kupwa teja byasa kukulondolola.
4 Bipangujo Bimobimo bya pa Kitako: Pa kushilula mīsambo, tompa kipangujo kimo pa bino:
◼ “Lelo mwingidijanga Lulombelo lwa Mfumwetu (lwitwa ne bu lulombelo lwa Tata Wetu) mu butōtyi bwenu?” (Mat. 6:9, 10) Pituluka bityetye mu ino milombelo, kupwa nena’mba: “Bantu bamo beipangulanga amba, ‘Le dijina dine dya Leza dyādi dinena Yesu amba dijile kijila (nansha kulēmekwa) i dijina’ka?’ Bakwabo nabo amba ‘Le Bulopwe bwine bwādi bunena Yesu amba twibulombe i Bulopwe’ka?’ Lelo kasha kodi ne mutane malondololo malumbuluke ku bino bipangujo?”
◼ “Lelo kasha kweipangwile amba: ‘Būmi budi na buluji’ka?’ ” Mulombole amba pa kuyuka buluji bwikadile’ko būmi kifwaninwe bidi kwikala na buyuki bwa kuyuka Leza.—Mus. 12:13; Yoa. 17:3.
◼ “Ulanga lufu kudi ne difuku dyolukapwa lonso?” Ingidija Isaya 25:8 ne Kusokwelwa 21:4 mwanda wa kumupa kilondololwa kyatondwa.
◼ “Lelo tuvutakanya twa ino ntanda tukekala na mfulo?” Lombola amba Leza witufundijanga’mba ‘sanswa mukwenu.’—Mat. 22:39.
◼ “Lelo kudi kimpengele kya konakanya ntanda kibwanya kulupuka kumeso’ku?” Muyukije amba Bible witulaile amba ntanda ikekala’ko nyeke.—Mit. 104:5.
5 Tusapulei myanda miyampe mu muswelo upēla, na kutenga pa mwanda mwine, ne kufwena bantu na kanye. Yehova uketwesela madyese pangala pa bukomo botulonga pa kwisamba na bantu nansha’tu “kinenwa” kimo kya bubinebine.