Akamwai Yehova Difuku Dyonso Dituntulu
1 “Kwakamwa Yehova yo ngalwilo ya tunangu.” (Mit. 111:10, NW) I bine, mwanda kwitusombelanga ku kwingila mingilo miyampe kadi kwitukwasha tuvundamine ku bibi. (Nk. 16:6) Kuno kwakamwa i bulēme bwa mushike botulēmekele Umpangi wetu, bwitutonwena ku kutyina kumufityija mutyima ne kubulwa kumukōkela. I kintu kyotufwaninwe kutamija ne kulombola difuku dyonso dituntulu.—Nk. 8:13.
2 Difuku ne difuku, mushipiditu wa ntanda ya Satana upwilanga potudi mpumpu ileta nzuba, ituningila kulonda mashinda ayo. (Ef. 6:11, 12) Ngitu yetu yakubulwa kubwaninina, mwendele kibutwila kyetu, nayo koku itukokela ku bibi. (Ngat. 5:17) Nanshi, shi tusaka kukōkela ku mbila ya Yehova, kwikala na nsangaji, ne kukamona būmi, tufwaninwe kumwakamwa difuku dyonso dituntulu.—Kup. 10:12, 13.
3 Bahebelu 10:24, 25 witusoñanya kubungakena pamo mwanda wa kwikankamika batwe bonso, ‘nakampata’ mu ano mafuku otudi’mo. Shi tusaka kwikala biyampe mu ano mafuku a mfulo, i biyampe kutanwa ku kupwila kitatyi ne kitatyi. Kwakamwa kwetu kotwakaminwe kufityija Leza mutyima kwitutonwenanga ku kupwila ne ku kumona kitungo kyako na mvubu mikatampe. Boba bakaminwe Leza bamonanga kunena mu kupwila kwa bwine Kidishitu bu dyese dijila.
4 Kukōkela ku lubila lwa kusapula myanda miyampe ya Bulopwe nako i muswelo mukwabo ulombola amba twakaminwe Leza. (Mat. 28:19, 20; Bil. 10:42) Kitungo kibajinji kya mwingilo wetu wa busapudi i kukwasha bakwabo nabo batamije kwakamwa Yehova ne kukōkela ku kiswa-mutyima kyandi. Tufikidijanga kino potujokanga kukapempula bantu dipya, potwikankilanga’ko kushilula nabo bifundwa bya Bible, ne potwibafundijanga mbila yonso ya Leza. Enka namino, tulombola kwakamwa kotwakaminwe Yehova ne buswe botuswele bakwetu.—Mat. 22:37-39.
5 Boba bakubulwa kwakamwa Leza kebabwanyangapo kutamija mutyima wa kumufwija’ko pa bintu bya ku mushipiditu, kadi kebejangapo kuponena mu luvula lwa ino ntanda luleta lufu, nansha mu mulangilo wayo. (Ef. 2:2) Nanshi kusumininwa kwetu kwikale kwa “kumwingidila Leza mīngilo ya kumuloeleja ku mutyima, ne ya kwakamwa kwa Leza, ne luzakalo ponka.” (Bah. 12:28) Nabya tukeselwa madyese abikīlwe boba bakaminwe Yehova difuku dyonso dituntulu.