Mpangiko ya Kubungakana kwa Kipindi
Buluji bumo bwa kishima kwakamwa i “kwikala na kalēmo kakatampe ne luzakalo, nakampata kudi Leza.” Kuno ko kwakamwa kwendele’mo kwisambila’po Bisonekwa amba yo ‘ngalwilo ya tunangu.’ (Mit. 111:10) Inoko mu ino ntanda ya Satana itujokolokele mudi kwakamwa kwa muswelo mukwabo. Lelo tubwanya namani kwepuka kuno kwakamwa kwa kubulwa kwendela’mo koku tutamija kwakamwa kwa kulēmeka Yehova? Mpangiko ya kubungakana kwa kipindi kwa mu mwaka wa mingilo wa 2002 ikalondolola kino kipangujo. Mutwe wa mwanda unena amba “Akamwai Leza Mumutumbike Ntumbo.” (Kus. 14:7) Tusa kwivwanija miswelo mivule yotumwenanga byabuyabuya mu kwakamwa Yehova batwe bonso umo umo ne bulongolodi bonso pamo.
Nansha kwakamwa byokwendelanga pamo na kuzumbijazumbija nansha kutyumuna mutyima ne kwikaka shi makambakano abakutambila, ino Bible unena’mba: “Kebo ba katōkwe shabo! bonso bakaminwe Yehova.” (Mit. 128:1) Mpangiko ya kuno kubungakana iketulombola muswelo wa kunekenya bikambija bitala pa mutōtelo wabine. Baketulombola muswelo wa kukwasha bapya nabo batamije kuno kwakamwa Leza kwendele’mo, kukebatonona bamwingidile na mutyima, muya, ñeni ne bukomo bwabo bonso. (Mako 12:30) Difuku dibajinji dikefula na kishinte kya mutadi wa distrike kinena amba “Lamata Mpata ku Boba Bosenswe.” Uketushintulwila motukokeja kudyumukila Dyabola na buninge bwalonga bwa kusaka kwitupalula kudi Yehova, ku kyetu kisaka, ne ku banabetu bene Kidishitu.
“Akamwai Yehova, Kemukyakamwai Bantu,” uno o mutwe wa mwanda wa kishinte kya mapingu aná kikanenwa mu difuku dya bubidi. Kiketushintulwila mwanda waka ne muswelo’ka otufwaninwe kukomena moyo o-onso witukankaja kwingila mwingilo wetu nansha kulama bululame bwetu ne mutyima wa mundamunda mulumbuluke ku masomo ne ku kaji. Kishinte kya bantu bonso kinena amba “Akamwai Leza ne Kulama Mbila Yandi” kimanine pa mulongo wa myanda isekunwinwe mu Kusokwelwa shapita 14. Kubungakana kwa kipindi kukafula na buludiki bulumbuluke buketulombola amba “Endelelai na Kunangila mu Kwakamwa Yehova.”
Masomo a Mwingilo wa Kiteokratike, Kupwila kwa Mingilo kwa kulondela’po, kishinte kya lubatyijo, Kiteba kya Mulami mu kīpi, bino byonso i myanda mikwabo mikatampe yokufwaninwepo kubulwa. Ita ne bantu bowifundanga nabo Bible bāye batanwe’ko pamo nobe. Yewa yense ukimba kukabatyijibwa ufwaninwe kulombola mutadi mwimaniji bukidi bonka kumeso kwa kitatyi. Batwe bonso tukalombola kwakamwa kukatampe kotwakaminwe Yehova ne kumupa ntumbo na kuleka kubulwa kipindi nansha kimo kya mu ino mpangiko milumbuluke mpata!