Mpangiko Ya Kubungakana Kwa Kipindi Kulonda’po

‘Lamai Bijila bya Leza Mumone Būmi,’ uno o mutwe wa mwanda wa kubungakana kwa kipindi kusa kwikala’ko, kukashilula mu Kweji 9.  (Nk. 4:⁠4) Kuno kubungakana kuketushintulwila mwanda waka kekilēmangapo kukōkela ku misoñanya ya Leza. Kuketulombola monka i muswelo’ka uletanga kuvuija kiswamutyima kya Leza busengi ne nsangaji yabine, ne lukulupilo lwa būmi bukāya kumeso.​—⁠Mat. 11:​28-30; Yoano 13:⁠17.

Bantu basakile kubatyijibwa ku kuno kubungakana kwa kipindi, mwendele musoñanya wa Kidishitu, bafwaninwe kuyukija mutadi mwimaniji, wa kukwata’po mpangiko ifwaninwe.​—⁠Mat. 28:​19, 20.

Mu kishinte kya mapingu, tukamona mu myanda mifwaninwe motukokeja kulombola buswe bwetu kudi Leza ne kudi banabetu. (Yoano 13:​34, 35; 1 Yoano 5:⁠3) Tukabandaula monka madingi akunka ku mutyima adi mu Mitōto 19 ne 119. Tukamona’mba akidi na mvubu ne dyalelo, nansha byoālembelwe tununu twa myaka kunyuma.

Kishinte kya bantu bonso kikanenwa na mutadi wa distrike “Akamwai Leza, Mulame ne Bijila Byandi.” (Mus. 12:13) Mu kishinte kyandi kyamfulo, mutadi wa kipindi ukalombola bankasampe’mba bakokeja kumwena biyampe mu būmi bwabo tamba’nka pano, ne kwikala na kikulupiji kya būmi bwanyeke bukāya kumeso. Ku mvuyo ya kubungakana, mutadi wa distrike ukatela byabuyabuya bivulevule bilupukanga ku kwikala na būmi bukwatañane na “kijila kya bulopwe” kya buswe. (Yak. 2:⁠8) Shi ke pano, ketwakibulwai kuno kubungakana!