Mpangiko mipya ya kubungakana kwa kipindi

Le i byabuyabuya’ka bya kamweno umbūmi byomwenanga dyalelo mu kunanga konañanga na Yehova? Ukokeja kunekenya namani matompo a bintu bya bwine ntanda bibwanya kushetula tumweno twa Bulopwe pa kifuko kibajinji mu būmi bobe? (Mat. 6:33) Lelo ukomenwanga kusansanya biyampe ne bibi mu ino ntanda imwekeja bintu bibi bu biyampe? (Bah. 5:14) Ino myanda ikabandaulwa ku kubungakana kwa kipindi kunena’mba: “Tumwenei Pano Byabuyabuya mu Kunanga mu Mashinda a Leza,” kukashilula mu Kweji 9, 1999.​—⁠Mit. 128:⁠1.

Kintu kipya kikamonwa ku kuno kubungakana mu dya Mposo i mwisambo ukapityijibwa pamo bwa Kupwila kwa Mingilo. Mutadi wenu wa kipindi ukalombola bipwilo bintu bya kuteakanya mwanda wa bonso bāye belongolole kala senene mwa kukaloelelwa byabinebine ino mpangiko.

Kipindi kidi na mutwe wa mwanda unena’mba “Bapania​—⁠Tadijai Senene Muswelo Omunanga” kiketulombola muswelo wa kwikala na tunangu ne bujalale bwa kuyuka kukūla kitatyi kifwaninwe mu mwingilo wa bupania. (Ef. 5:​15-17) Mutwe wa mwanda “Dyumukai Mashinda Amweka ku Meso Bitupu bu Mayampe” uketufundija mwa kujingulwila senene bintu bitabijibwe na Leza mu ngikadilo yo-yonso ya mu būmi bwetu. Kishinte kinena’mba “Bupolofeto Bufikidila Bwituteñanga Namani” kiketukwasha tuyuje mu ñeni ne mu mityima yetu buswe bwa kuswa Kinenwa kya Leza. Kishinte kya bantu bonso “Dishinda dya Leza​—⁠Muswelo Odileta Byabuyabuya!” nakyo kikalombola byabuyabuya bya kamweno umbūmi byotumwenanga pano mu kulonda kotulondanga misoñanya myoloke itusakila Yehova kulonda.

Lelo wabilanga kulombola patōka na kubatyijibwa kwa mu mema amba usakanga kunangila mu mashinda a Leza bu umo wa mu bengidi bandi bepāne? Nankyo kesambe na mutadi mwimaniji, nandi ukayuka kya kulonga’po.

Witūdile kukatanwa’ko bu kyobe kitungo, kutyina’mba wakabulwa kuno kubungakana kwa kipindi kwa pa kitatyi kifwaninwe. Tanwa ku mpangiko ya mafuku onso abidi, mwanda “ba katōkwe kabo, shabo!” i boba “bonso bakaminwe Yehova, banañanga mu mashinda andi.” ​—⁠Mit. 128:⁠1.