Mpangiko ya Kubungakana Kwa Kipindi
1 Kuno kubungakana kwa kipindi kukashilula mu kweji wakitema kukekala na mutwe wa mwanda unena’mba: “Tutejei ne Kwifunda Kwingidija Kinenwa kya Leza.” Uno mutwe wa mwanda ukemanina pa Kupituluka 31:12, 13, i mukwatañane na ino mpangiko, ikabandaula na mushike bufundiji botufwaninwe kwifunda ne kwingidija.
2 Nansha shi bantu bavule dyalelo batele matwi ku binenwa bya ku bukomo bwa bandemona, ino i kya kamweno kakatampe ku umo ne umo umbukata mwetu kuteja Kinenwa kya Leza ne kufunda kwingidija’kyo. (Luka 11:28; 1 Tem. 4:1) Myanda yonso ikabandaulwa ku kuno kubungakana kwa kipindi i miteakanibwe senene mwanda wa kukakankamika ne kukakwasha basapudi, bisaka, bakulumpe ne bapania. Mu dyamposo, kukanenwa kishinte kya mapingu aná kidi na mutwe wa mwanda unena’mba: “Tunekenyei Makambakano etu na Kuta Mutyima ku Kinenwa kya Leza.” Kikwabo kikanenwa mu dyayenga lubanga kidi na mutwe wa mwanda unena’mba: “Bisonekwa Bitulemununanga Umboloke.” Mpangiko yonso mituntulu ikekala na myanda mivule ya kwitukankamika kumushipiditu yokemufwaninwepo kubulwa abe ne kyobe kisaka.
3 Mu dyamposo ne mu dyayenga, muketupebwa madingi mafwaninwe atala pa busapudi ne byakumwenako pamo. Mukateleka’ko bwipangudi ne myanda imonwanga mu busapudi yūbaka kumushipiditu kadi iboilwa’po ñeni. Shi ekale mukatenwe’ko, mushikete talala muteja na kitungo kya kwingidija myanda yomwifunda, nabya mukekala na manwa a kulēmeka mbila idi mu Kinenwa kya Leza.
4 Kubatyijibwa kwa boba bepēne pano-pano kudi Leza ukekala mwanda mukatampe ukashala uvulukilwa’po kuno kubungakana kwa kipindi. Kumeso kwa kulombola patōkelela kwipāna kwabo, boba basaka kubatyijibwa bafwaninwe kuyukija kusaka kubatyijibwa kwabo kudi mutadi mwimaniji pa kyabo kipwilo, aye nandi ukakwata mpangiko ya kutonga bakulumpe ba kukesamba nabo.
5 Kishinte kya bantu bonso kikanenwa ku kuno kubungakana kukalongwa mu bifuko bishileshile kidi na mutwe wa mwanda unena’mba: “Mwanda Waka Tufwaninwe Kwitabija Kuludikwa na Bible?” Itai bantu basepelele musapu. Mwiteakanyei byabinebine mukatanwe ku kupwila konso, kutyina’mba mwakabulwa kukankamikwa ne kukwashibwa komufwaninwe kukamwena’ko, abe pamo ne kyobe kisaka.