Mpangiko ya Kubungakana kwa Kipindi

Mu ino “myaka ya malwa,” bitusakila kwikala na tunangu twa Leza pa kwitabijibwa na Yehova. (2 Tem. 3:1) Mpangiko ya kubungakana kwa kipindi ya mwaka wa 2005 iketupa madingi a kamweno umbūmi ne kwitukankamika pakavungululwa kishinte kinena amba “Twendejibwei na ‘Tunangu Tutūke Mūlu.’”​—Yak. 3:17, NW.

Dishikulu dibajinji dya mapingu dinena amba: “Tulombolei ‘Tunangu Tutūke Mūlu’ mu Bwetu Būmi,” diketukwasha tuyuke kyokya kyobetulomba pa kwikala bantu batōka, ba ndoe, ba bujalale, ne ba mutyima wa kukōkela. Kupwa mutadi wa kipindi ukakokela milangwe yetu ku mitamba mikwabo isatu ya tunangu twa Leza. Mutadi wa distrike ukavuya difuku dibajinji na kulombola muswelo ukumbanibwe bengidi bene Kidishitu mwa kusapwila tunangu twa Leza, nansha byobamonwa na bamobamo bu “bakubulwa kufundijibwa, bampikwa ñeni.”​—Bil. 4:13.

Mu difuku dya bubidi, dishikulu dya mapingu didi na mutwe wa mwanda unena amba, “Tulondelondei Bintu Bitamija” diketukwasha tujingulule ne kupela bintu bibwanya kwituzozeja ku mushipiditu. Kadi diketulombola muswelo otubwanya kutamija bantu bakwabo ku kupwila kwa pa kipwilo, mu mwingilo wa budimi, ne mu kisaka. Dishikulu dya bantu bonso dinena amba “Muswelo Otumwena mu Tunangu twa Leza,” diketupa mutyima wa kufwija’ko bikatampe pa kamweno kotumwena mu kulēmeka misoñanya ya Leza mu bwetu būmi. Dishikulu dya mfulo dinena amba “Būmi Bukwatañane na Tunangu twa Leza Bwitulama,” diketupa bukomo bwa kutyipa lukwembo lwa kulomba Yehova etupe tunangu mu ano mafuku a mfulo.

Mwanda mukwabo mukatampe umwekanga ku kubungakana konso i kubatyijibwa kwa bana ba bwanga bapya. Masomo a Mwingilo wa Kiteokratike ne Kifundwa kya Kiteba kya Mulami kya mu yenga’wa nabyo bikapityijibwa mu ino mpangiko. Yehova usaka amba batwe bonso tumwene mu tunangu twapāna. Bine, batwe bonso tukapetejibwa ku mushipiditu na madingi ne kukankamikwa kwitutengele ku kubungakana kwetu kwa kipindi.​—Nk. 3:13-18.