Kubungakana kwa Kipindi Kwitukwasha Tulame Būmi Bwetu bwa ku Mushipiditu
1. Lelo Yehova witukwashanga tuvuije mwingilo wa kusapula myanda miyampe kupityila ku bika ne bika?
1 Yehova i kyaba bulāle, witupanga bulombodi, bufundiji, ne bukankamane bwitusakilwa pa kuvuija mwingilo wa kusapula myanda miyampe waetupele. (Mat. 24:14; 2 Tem. 4:17) Kubungakana kwetu kwa kipindi kwa mwaka ne mwaka nako kubadilwa mu bino bintu. Mpangiko ya kubungakana ya mwaka wa mingilo wa 2010 ikekala na mutwe wa mwanda unena’mba: “Lama Būmi Bobe bwa ku Mushipiditu,” mungya Loma 8:5 ne Yude 17-19. Ino mpangiko ikashilula tamba mu yenga wa 31 Kweji 8, 2009.
2. (a) Le i muswelo’ka otukamwena mu kubungakana kwa kipindi? (b) Lelo kubungakana kwa kipindi kwa myaka ishele kunyuma kwakukweshe namani mu mwingilo?
2 Kamweno Kotukamwena’mo: Ino mpangiko iketudyumuna ku byaka, kimfwa ku bilabi bitujimija kitatyi ne kwitupuakanya tuleke kuta mutyima ku bintu bya kamweno. Tukayuka mwa kulwila na mushipiditu wa kilomo-nyeka, kadi tukabandaula mwikadilanga muntu wa ku mushipiditu. Dishikulu dya mapingu dikanenwa mu Dya Yenga dikalombola umo ne umo ne bisaka byonso matabula a mwa kukomejeja būmi bwabo bwa ku mushipiditu mu ino mitabakano ne matompo makomo a mu lwitabijo enda avudila’ko. Mpangiko iketukwasha tulame mityima yetu, būmi bwetu bwa ku mushipiditu, ne kulama mu milangwe yetu madyese makatakata atengele boba balamine būmi bwabo bwa ku mushipiditu.
3. Le i kitatyi’ka kikalongwa kubungakana kwenu kwa kipindi, ne ufwaninwe kusumininwa kulonga bika?
3 Pokayuka kitatyi ne kifuko kikalongelwa’ko kubungakana kwa kipindi, kwata mpangiko ya kutanwa’ko ne kulonda bipimpo byonso mu mafuku abidi. Kulupila amba Yehova weselanga makasa a muntu mupyasakane.—Nk. 21:5.
4. Le tukulupile kutambula bika ku kubungakana kwa kipindi kwiya’ko?
4 Na bubine, Yehova ye upāna kino kyabuntu kilumbuluke. Mpangiko ilongolwelwe na kabumbo ka mupika wa binebine, udi na manwa yo itusakilwa amba twendelele kwikala bengidi Bene Kidishitu. Tufwija’ko Yehova pangala pa mpangiko yonso ya buswe itukwasha “tūminine konka ku kwitabija kwa kukulupila kwetu, ne kulangalanga kwine mpika.”—Bah. 10:23-25; Yak. 1:17.