Mpangiko Itūdilwe Bengidi Bene Kidishitu
1 Mu 1938, bulongolodi bwa Yehova bwashilwile mpangiko mipya. Bisumpi bya bipwilo byadi bītwa kukatanwa ku kubungakana kwa zone, kwitwa pano bu kubungakana kwa kipindi. Na kitungo’ka le? Dipepala Informateur (ditwa pano bu Mwingilo Wetu wa Bulopwe) dya mu Angele dya Kweji 1, 1939 dyalondolwele’mba: “Kuno kubungakana kubadilwa mu Bulongolodi bwa Kiteokratike bwa Yehova mwanda wa kwendeja mwingilo wandi wa Bulopwe. Bufundiji bufundijibwa’ko budi na kamweno ku umo ne umo mwa kwingidila senene mwingilo umupelwe.” Kitatyi kyotubandaula kwilundila’ko kwa basapudi ba Bulopwe badi’tu 58 000 mu 1938 kufika ku 7 000 000 ne musubu mu 2009, i kimweke patōka’mba kubungakana kwa kipindi kufikidijanga kitungo kya kukwasha bengidi “bengile mwingilo wibapelwe”!
2 Mutwe wa Mwanda wa ku Mwaka: Tutengele ino mpangiko ikashilula mu Kweji 9 ne byonso byoiketukankamika. Mutwe wa mwanda “Kemudi ba mu Bapanopantanda” i mulupulwe mu Yoano 15:19. Lelo i mashikulu’ka amoamo akamwena’mo bengidi Bene Kidishitu? Dya Mposo tukateja dishikulu “Mwingilo wa Kitatyi Kyonso Witukiñanga—Muswelo’ka?” Kadi tukevwana ne dishikulu dya mapingu asatu “Kokasubijibwa na . . .” “Kinyema,” “Wabwitwa Mukatampe,” ne “Bansunga.” Dya Yenga tukevwana dishikulu dya mapingu didi na mutwe wa mwanda “Sanswa Yehova, Kokasanswa Ntanda.” Mu mashikulu makwabo mubadilwa “Ikalai Nyeke bu ‘Bēni Balupito,’” ne “Komejai’nka Mityima Yenu! Mubwanya Kunekenya Ntanda.”
3 Pa kupwa kutanwa ku kubungakana kwa kipindi kwa panopano, kaka umo wadi ke mukōke mu mwingilo wasonekele amba ino mpangiko yamukweshe abandaule ngikadilo yadi’mo ne kusumininwa “kutambila mu mwingilo ne kuleka kwibingija!” Ne kutatana kwine mpika mpangiko ya kubungakana kwa kipindi ya mwaka wiya’ko isa kwitukwasha batwe bonso tusanswe Yehova pa kyaba kya kusanswa ntanda. (1 Yoa. 2:15-17) Longai bukomo mukatanwe’ko ne kuteja na katentekeji amba mumwene ne pa mfulo mu ino mpangiko ya buswe itūdilwe bengidi Bene Kidishitu!
[Bipangujo bya Kifundwa]
1. I mpangiko’ka mipya yashilwile mu 1938, ne na kitungo’ka le?
2. I myanda’ka le ikanenwa ku kubungakana kwetu kwa kipindi ku mwaka wa mingilo wiya’ko?
3. Shi tukatanwe ku kubungakana kwa kipindi i bika byotukamwena’mo?