Lama Manwa Obe

1. Le kubungakana kwa kipindi kwa mwaka wa mingilo wa 2013 kudi na mutwe wa mwanda’ka, ne ino mpangiko le idi na kitungo’ka?

¹ Yesu wāfundije bana bandi ba bwanga basanswe Yehova ne mutyima wabo onso, ne muya wabo onso, ne manwa abo onso. (Mat. 22:37, 38) Bitango ne kubungakana kwa kipindi ne kwa pa bula bya uno mwaka i biteankanibwe mwanda wa kwitukwasha tukomeje muntu wetu wa munda. Twimuvuluja’mba mutwe wa mwanda wa kitango kya distrike unena’mba “Lama Obe Mutyima!” Mpangiko ya kubungakana kwa pa bula kwa difuku dimo kwa mu mwaka wa mingilo wa 2013 kudi na mutwe wa mwanda unena’mba “Lama Mutyima Obe wa Mundamunda.” Ne kubungakana kwa kipindi nako kukalongeka kushilula kweji wiya’mo kukesambila pa mutwe wa mwanda unena’mba “Lama Manwa Obe,” wimanine pa Mateo 22:37. Ino mpangiko i miteankanibwe mwanda wa kukwasha umo ne umo umbukata mwetu abandaule milangwe yandi’mba Yehova eisangele.

2. Tukakimba bilondololwa ku bipangujo’ka papityijibwa mpangiko?

² Bine Byotukabandaula’ko: Potuteja ku kubungakana tutei mutyima nakampata pakalondololwa bino bipangujo biselele myanda mikatampe:

• I muswelo’ka otukokeja kwepuka kwikala na ‘milangwe ya bantu’?

• I muswelo’ka utukokeja kutalula bilenda bisaba meso a mutyima a bakubulwa kwitabija?

• Le i mutyima’ka otufwaninwe kwikala na’o?

• Le kulanguluka kudi na kamweno’ka?

• I muswelo’ka otukokeja kuleka Yehova alemunune milangwe yetu?

• Balume, bakaji, bambutwile ne bana bakokeja namani kutyangila ku nsangaji ya kisaka?

• I muswelo’ka otukokeja kwikala beteakanye ku difuku dya Yehova?

• Le kuningija mityima yetu kushintulula bika?

• I byabuyabuya’ka bimonanga boba bengidija byobya byobefunda?

3. Mwanda waka kidi na mvubu kutanwa ku kubungakana mafuku onso abidi, kuteja na katentekeji, ne kwingidija myanda yotu kafunda’ko?

³ Satana ulonga bukomo bwa kulwa na manwa etu ne kwiongola. (2 Kod. 11:3) Nanshi tufwaninwe kukinga manwa etu ne kulama ñeni yetu. Tusakilwa nyeke kulombola mutyima wa Kidishitu na kulwa na lupusa lwa ino ntanda lwitukokela ku kubulwa kulēmeka bijila. (1 Kod. 2:16) Shi ke pano witeakanye biyampe ukatanwe ku kuno kubungakana kwa kipindi kwa mafuku abidi. Teja na katentekeji. Kwingidija myanda mikatampe yotukefunda’ko kuketukwasha tuteakanye manwa etu na kupyasakena mu mwingilo wa Bulopwe.—1 Pet. 1:13.