Mpangiko Ya Kubungakana Kukwabo Kwa Kipindi

“Tulamei Kitatyi Kyonso Difuku dya Yehova mu Ñeni Yetu,” uno o mutwe wa mwanda wa kubungakana kukwabo kwa kipindi kukashilula kulongibwa tamba mu kweji wakitema. (2 Pet. 3:12) I kulongololwe mwanda wa kwitusombela ku mingilo. Panopano ponka, butyibi bwa Yehova bukaponena pa bekadi bonso ba pano panshi. Lelo i ani ukapanda ku “difuku dikatakata dya Leza, Mwinebukomobonso”? I bonka boba batengele kumushipiditu, bekele na būmi bulumbuluke mu ‘bilongwa bya mwiendelejo ukola ne milongelo ilombola bwine Leza.’​—⁠Kus. 16:14; 2 Pet. 3:⁠11.

Shi muntu usaka kupanda ku difuku dya Yehova, i kya mvubu ekale kubatyijibwa. (1 Pet. 3:21) Basapudi babila kubatyijibwa ku kuno kubungakana bafwaninwe kuyukija mutadi mwimaniji, nandi ukakwata mpangiko mifwaninwe.

Kishinte kya mapingu aná, kidi na mutwe wa mwanda unena’mba “Bantu ba Muswelo Kampanda Otufwaninwe Kwikala,” kikalombola patōka kyotufwaninwe kulonga mwanda wa kulama kitatyi kyonso kwikala’po kwa difuku dya Yehova mu ñeni yetu. Kishinte kya bantu bonso, kidi na mutwe wa mwanda unena’mba “Ingidijai Tunangu Pano Pafwena Difuku dya Yehova,” kikashintulula buluji bwa ‘kukimbila Yehova, boloke ne kwiubija’ mwanda wa kukabadilwa mu bantu bakapanda.​—⁠Zef. 2:⁠3.

Kubungakana kwa kipindi kukafula na bishinte bibidi bikankamika bikapityijibwa na batadi bendakana, binena’mba “Lelo Būmi Bobe Bwimanine pa Bubinebine?” ne amba “Twilongololei Koku Tulamine Difuku dya Yehova mu Ñeni Yetu.” Bino bishinte biketukwasha tulanguluke pa būmi bwetu ne pa muswelo otufwaninwe kwilemununa. Bupolofeto bwa mu Bible ne binkumenkume bilongeka kujokoloka ntanda yonso bilombola patōkelela amba difuku dya Yehova didi pabwipi ponka. Mpangiko ya kuno kubungakana iketukwasha ‘tutūkije mityima ne kutengela.’ (1 Pet. 5:⁠8) Tukwatei mpangiko mishikate mwanda wa kukatanwa’ko.