‘Bidibwa pa Kitungo kya Mwaka po Kitungilwe’
1 Pa kupwa kubungakana kwa pa bula kwa difuku dimo, divule twikalanga tunena’mba, “E byo twadi tusaka!” Mutadi umo wa kipindi wanene amba pa kupwa kulonda kitango, bamo mu kyandi kipindi balombwele mutyima wabo wa kupyasakena mu mwingilo. Mutadi umo wendakana wanene amba: “Kyetukweshe tulangulukile poketudi mu mbadilo ya bitatyi potubandaula butongi botutonga umbūmi.” Mukwabo nandi amba, “Basapudi bavule banenene mulangwe wa amba kuno i kulangula kobebalangula mwanda wa bajingulule shi batele mutyima ku kintu kya mvubu mpata, mwingilo wa busapudi.” Le nobe kubungakana kwa pa bula kwa difuku dimo kwakukweshe namani?
2 Mpangiko ya mwaka wa mingilo wiya’ko nayo i enka yotusakanga. Idi na mutwe wa mwanda ‘Kulupila Mudi Yehova,’ ulupwilwe mu Mitōto 118:8, 9. Talai myanda imoimo ikesambilwa’po: “Mwikadile Yehova bu Nsakwa mu Bitatyi bya Tusua,” “Kwasha Bakwabo Beubije mu Mapapa a Yehova,” “Iula Yehova na Kwikala Kinyemeno,” “A Bankasampe, Tūlai Yehova bu Lukulupilo Lwenu!” ne “Paladisa Yetu ya ku Mushipiditu I Kinyemeno Kitūdile’ko Yehova.”
3 Pa Kumwena’mo: Shi abemusapwila difuku dya kubungakana, kwatyidila mpangiko ya kutanwa’ko, wite ne bowifundanga nabo Bible. Pa kusaka’mba tupe “bipa ne kutūkija mutyima ponka,” tufwaninwe kulama mu mutyima byobya byotuteleka. (Luka 8:15) Nanshi teja mpangiko na katentekeji, ne kusoneka mu kīpi myanda mikatampe ne bulombodi bomona’mba ukebwingidija mu būmi ne mu mwingilo obe. Shi kubungakana kubapu, lea’ko kitatyi kya kwisambila mu kisaka myanda ya mu mpangiko, bandaula miswelo mipotoloke mokokeja kwingidija’yo abe ne kyobe kisaka.
4 Pamo bwa byakudya bya munsonso bīta ngitu, kubungakana kwa pa bula kwa difuku dimo kwa uno mwaka i kuteakanibwe na buswe bukatampe ne kulanguluka. Tulomba Yehova esele bukomo bomulonga’mba mukatanwe’ko ne kumwena mu bino ‘bidibwa pa kitungo kya mwaka po kitungilwe’ bya kutamija ku mushipiditu bengidi Bene Kidishitu.—Mat. 24:45.
[Bipangujo bya Kifundwa]
1. Lelo kubungakana kwa pa bula kwa difuku dimo kwakukweshe namani abe ne bantu bakwabo?
2. I bika le bikabandaulwa mu mpangiko ya mwaka wa mingilo wiya’ko?
3. I muswelo’ka otukamwena ne pa mfulo mu kutanwa’ko?
4. Mwanda waka tutengele na kipyupyu kubungakana kwetu kwa pa bula kwa difuku dimo kwiya’ku?