Muswelo Mupya wa Kupituluka mu Mpangiko ya Kubungakana
Ayo ntanda ya Satana yendelela kumeso mu kulonga bibi, Yehova nandi wenda witukomeja twikale “kupela bumpikwa bwine-Leza, ne bya kilokoloko kya panopantanda, ne kwikala bakwilemeka senene, ne bakoloka ne ba bwine-Leza ponka panopantanda.” (Tet. 2:12) Mu mpangiko yaetupa kupityila kudi ‘umpika wa binebine ne wa manwa’ mubadilwa ne mpangiko ya pa mwaka ya kubungakana kwa kipindi ne ya kubungakana kwa pa bula kwa difuku dimo. (Mat. 24:45) Bine, kuno kukongakana kwitukomejanga bininge!
Kudi muswelo mupya wa kupituluka mu mpangiko ya kubungakana otukengidija mu mwaka wa mingilo wa 2005, mwanda wa kwitukwasha tulame ne kulonda bufundiji botutambula. Mu dino dyani dya ntentekelo, pa paje 5-6, mudi myanda ne bipangujo bya kupituluka bitala pa mpangiko ya kubungakana ne kubungakana. Bipwilo bikabandaula ino myanda mu Kupwila kwa Mingilo kumeso’tu kwa kukatanwa ku kubungakana ne pa kupwa’tu kwiya’ko. Le ikabandaulwa namani?
Yenga umo nansha abidi kumeso kwa kipwilo kukatanwa ku kubungakana kwa kipindi, dishikulu dya minite dikumi dikanenwa mu Kupwila kwa Mingilo mwa kulangwila ndyoko pa ino mpangiko, ne dikemanina pa kishinte kinena’mba “Mpangiko ya Kubungakana kwa Kipindi.” Muneni ukakokela milangwe pa bipangujo bya kupituluka ne kukankamika bonso bakalembe’ko tumyanda mwa kwiteakenya ku kupituluka kukalonda’ko mu mayenga matyetye kupwa kwa kuno kubungakana.
Mayenga matyetye pa kupwa kwa kuno kubungakana, kupituluka kwa minite 15 kwa myanda ya mu difuku dibajinji kukatwejibwa mu Kupwila kwa Mingilo. Yenga ukalonda’ko, minite 15 ikapityijibwa mu kupituluka mpangiko ya difuku dya bubidi. Bipangujo bya kupituluka biletelwe mu dino dyani dya ntentekelo byo bikengidijibwa mu ino mīsambo. Kupituluka kufwaninwe kwimanina pa kamweno ka myanda’ya umbūmi. Bakulumpe bakokeja padi kwipipija bipindi bimo bya mu Kupwila kwa Mingilo, kwibitalula, nansha kwibipanga muswelo mukwabo mwa kukwatañaninya’byo na bino bipindi bya kupituluka.
Uno o muswelo umo onka ukapitulukwa mu mpangiko ya kubungakana kwa pa bula, ino kwishila kumo i amba mpangiko yonso ikapitulukwa enka mu kipindi kimo kete kya minite 15. I biyampe batwe bonso tulame dino dyani dya ntentekelo mwa kwingidijija’dyo pa kutambula buno bufundiji bulumbuluke bupāna Yehova.—Is. 48:17, 18.