Kinenwa kya Leza I kya Bukomo
1. Le kitango kya pa bula kya difuku dimo kya mwaka wa mingilo wa 2014 kidi na mutwe wa mwanda’ka?
1 Kwishila na kintu kyo-kyonso kilongelwe na bantu bampikwa kubwaninina, Bible udi na bukomo bwa kwitushinta, ulengeja milangwe yetu ne mashinda etu akwatañane na kiswa-mutyima kya Yehova. Le Kinenwa kya Leza kidi na bukomo bwa muswelo’ka? Le i muswelo’ka otubwanya kwingidija bukomo bwakyo mu bwetu būmi? Le i muswelo’ka otubwanya kwikingidija senene mwanda wa kukwasha bantu bakwabo? Tukulupile’mba kitatyi kikabandaulwa ino myanda ku kitango kya pa bula kya difuku dimo kiteakanibwe mu mwaka wa mingilo wa 2014, batwe bonso tukōbakwa ku mushipiditu. Mutwe wa mwanda wa kino kitango i ‘Kinenwa kya Leza I kya Bukomo,’ ulupwilwe mu Bahebelu 4:12.
2. Le tufwaninwe kuteja malondololo a bipangujo’ka?
2 Tana Malondololo a Bino Bipangujo: Pokateja ino mpangiko, soneka malondololo a bipangujo bilonda’ko.
• Mwanda waka tufwaninwe kukulupila mu Kinenwa kya Yehova? (Mit. 29:4)
• Le i muswelo’ka otubwanya kwimwena bukomo bwa Kinenwa kya Leza mu bwetu būmi? (Mit. 34:8)
• Le ubwanya kumwekeja namani bukomo bwa kinenwa kya Leza mu busapudi? (2 Tem. 3:16, 17)
• Le i muswelo’ka otubwanya kwepuka kukwatwa na bukomo bwa kyongo bwa ntanda ya Satana? (1 Yoa. 5:19)
• Byokidi nkasampe, i muswelo’ka obwanya kutama ku mushipiditu? (Yel. 17:7)
• Le i muswelo’ka otubwanya kwikala bakomo nansha ke mu kitatyi kyotudi bakōke? (2 Kod. 12:10)
• Le i bika byotufwaninwe kulonga pa kushinta mu būmi bwetu, nansha shi twadi na bibidiji ne mikadila mibi mu kitatyi kilampe? (Ef. 4:23)
3. Kutentekela pa kuteja ku kitango, le i muswelo’ka mukwabo otubwanya kumwena mu kitango kya pa bula kya difuku dimo?
3 Bine, tukamwena byabuyabuya bivule mu kwivwana ino myanda ya mvubu! Kadi, kitango kya pa bula kya difuku dimo, pamo ne kintangao kya kipindi ne kya distrike, biketupa mikenga ya kubaijibwa ne kusangela mu bu bana na bana na batutu ne bakaka ba mu bipwilo bikwabo. (Mit. 133:1-3; 2 Kod. 6:11-13) Nanshi, wilamije’ko kitatyi kya kwisamba na balunda ba kala, ne kukimba balunda bapya. Shi muneni mupempudi pamo bwa mutadi wa ntanda nansha tutu wa ku Betele i mutumwe ku kitango kyenu kya pa bula kya difuku dimo, ubulwe’po kumulubula aye ne wandi mukaji? Na bubine, tudi na bubinga buvule bwa kutengela kino kitango kya pa bula kya difuku dimo kiya’ko!