Mpangiko ya Kubungakana kwa pa Bula kwa Difuku Dimo
Bene Kidishitu babajinji bākomejibwe na mushipiditu sandu, o mwanda bepēne bikatampe mu kusambakanya myanda miyampe konsokonso pi na pi pano pa ntanda. (Bil. 1:8; Kol. 1:23) Mpangiko ya kubungakana kwa pa bula kwa difuku dimo ya mu mwaka wa mingilo wa 2007 inena’mba ‘Ikalai Balēmenenwe ne Mwanda,’ iketukwasha twiule kimfwa kyabo kilumbuluke.—Bil. 18:5.
Mulopwe Davida wēsambīle pa kinenwa kya Leza amba: “Busapudi bwa Yehova i busumininwe, budyumuna bendalale ke badyumuke.” (Mit. 19:7) Ino mpangiko ya kubungakana kwa pa bula kwa difuku dimo kwa mu 2007 miteakanibwe biyampe ikakoma kamweno ka Bisonekwa pa “kulombola ñeni ya umboloke,” kadi iketukankamika twikale twingidija Kinenwa kya Leza potusapula ne kufundija na mutyima wa kampeja-bukidi. (2 Tem. 3:16, 17) Ino mpangiko ikalombola motukokeja kwepukila makinga ne kumwena byabuyabuya mu kulonda misoñanya ya mu Bible mu būmi bwa difuku ne difuku. Kadi iketukwasha twikale twingidija Kinenwa kya Leza pa kukwasha bankasampe ne bapya bendelele ku mushipiditu.
Longa buninge bwa kukatanwa’ko pashilula mpangiko, ne kuta’ko mutyima bininge. Lemba’ko myanda yobwanya kwingidija. Ikala na mutyima wa kufwija’ko pangala pa bufundiji ne bivulujo byokatambula’ko, kadi langa ne muswelo okengidija myanda yokafundijibwa.
Ino mpangiko ya kubungakana kwa pa bula kwa difuku dimo iketupa mutyima wa kufwija’ko Leza pangala pa Kinenwa kyandi kadi iketuvuluja twendelele nyeke kusapula myanda miyampe ya Bulopwe na bupyasakane, ne kwitulombola mwa kukwashisha bakwabo nabo balongele monka. Nanshi kokabulwa nansha dimo buludiki ne bufundiji bwa ku mushipiditu bukupa Yehova mu uno muswelo!